2 qańtar. Aq tútek boran. Qar belýardan. Semeıden kelgen demalýshylar Qazymbet aýylynan 6 shaqyrym jerdegi alty aı jaz qaınap jatatyn omarta sharýashylyǵyna serýendep qaıtpaq bolyp, motoshańǵymen jolǵa shyqqan. Otbasyly úsh demalýshylardyń biri 9 jastaǵy qyz bala edi...
Borandy kúni aýyl arasyn qoıyp, aýyl ishinde adasyp ketip jatqandardy da estigenbiz. Onyń qasynda dalaly jerde qaýip eki ese. Tórt kún ótip, demalýshylardan habar bolmaǵan soń 5 qańtarda týysqandary Úrjar aýdany ákimdiginen kómek suraıdy. Aýdan basshylyǵy jedel shtab quryp, Tarbaǵataı ulttyq parkiniń dırektory mindetin atqarýshy Qaldybek Sársembaevpen aqyldasa kele, park qyzmetkerlerin izdeýge jiberýdi jón kóredi. Qalaı degenmen, ınspektorlar mańaıdyń oı-qyryn jaqsy biledi ǵoı.
Tapsyrmany qup alǵan park qyzmetkerleriniń biri motoshana minip, endi biri shańǵy baılap, túski saǵat on ekilerde omarta betke alysqan. Bul kúni de boran báseńdeı qoımaǵan edi. Bet qaratpaıdy, júris óndimeıdi. On-on bes mınýtta jetip baratyn omartaǵa ormanshylar keshki jetide bir-aq ilingen. Sóıtse, demalýǵa kelgen otbasy qojalyqqa jetýin jetkenmen, qar qursaýyna qamalyp, keri qaıta almaǵan eken. Qar basqan taýly jerde qybyr etken jan, kóldeneń iz baıqalmaǵan soń jolǵa shyǵýǵa da táýekel etpegen. Onyń ústine, telefon baılanysy da joq edi. Inspektorlar jete sala rasııa arqyly jaǵdaıdy baıandap, alańdaýly týystaryn bir qýantqan. Al, ózderi demalýshylardy alyp, jolǵa ertesi kúndiz biraq qamdanǵan edi.
Jalpy, Tótenshe jaǵdaılar departamenti qyzmetkerleri boran-shashyndy kúni jolǵa shyqpaý kerektigin qansha eskertkenimen, keıbireý qulaq asa bermeıdi. Qulaq asa bermegen soń oqys oqıǵalarǵa tap bolyp jatady.
Abaı oblysy,
Úrjar aýdany