Amerıkalyq rejısser Djeıms Kemeronnyń «Avatar» fılmi alǵash 2009 jyly kórermenge jol tartqan bolatyn. Bul týyndynyń jalǵasy «Avatar: Sý joly» ótken jyly qazaq tiline aýdarylyp, elimizdiń barlyq kınoteatrlarynda kórsetilip jatyr.
Bizdiń aıtpaǵymyz bul emes. Atalǵan fılmniń basty keıipkerleriniń biri – ushqysh Trýdı Chakon rólin somdaǵan Maıte Mıshel Rodrıgestiń (Mayte Michelle Rodriguez) qazaqtyń ómir-saltyna qatystylyǵy týraly.
Bul ártis 2014 jyly qazan aıynyń ortasynda Mońǵolııaǵa, sonyń ishinde qazaqtar qonystanǵan Baı-О́lke aımaǵyna kelip, bul ólkede jyl saıyn dál osy ýaqytta ótetin «Búrkitshiler festıvalin» tamashalaǵan eken.
Osy saparynda alǵan áseri jaıynda Maıte Mıshel 2014 jyly 12 qazan kúni óziniń tvıtter paraqshasyna pikir jazyp, tanymal qusbegi Aısholpan men onyń ákesi Nurǵaıyppen birge túsken fotosyn jarııalapty.
Dál osy jolǵy búrkitshiler saıysynda Aısholpan jeńiske jetip bas báıgeni jeńip alǵanyn kórgen Gollıvýd juldyzy ony ózi kelip quttyqtapty. Sondaı-aq 2015 jyly 12 qańtarda amerıkalyq bir basylymǵa bergen kezekti suhbatynda:
«...Men úshin búrkitshiler otbasynan shyqqan 13 jastaǵy kishkentaı qyzdyń jeńiske jetkenin kórý ǵanıbet boldy. Ol 40-50 jastaǵy erlerdiń bárin artqa tastap, festıvaldiń bas búrkitshisi atandy. Tańdanarlyq dúnıe – musylman otbasynyń otaǵasy óziniń jas qyzyna qusbegilik ónerdi úıretýi» degen eken.
Osy tusta ayan travel (www.toursmongolia.com) atty aǵylshyn tildi saıt «Mıshel Rodrıges Mońǵolııada ótken «Altyn búrkit» ańshylyq festıvalinde» (Michelle Rodriguez in Mongolia for Golden Eagle Hunting Festival) degen taqyryppen onyń móltek suhbatyn jarııalapty. Osy shaǵyn áńgime barysynda Mıshel Rodrıges: «Meniń naǵyz genetıkalyq shyǵý tegim – mońǵoloıd. Ata-babalarym osy daladan Amerıkaǵa myńdaǵan jyl buryn Alıaska arqyly qonys aýdarǵan eken. Men bul qupııany National Geographic zertteý ortalyǵynda DNQ synamasynan ótken kezde bildim» depti.
«Avatar» ártisiniń nazaryn aýdarǵan Aısholpan qazir Almaty qalasyndaǵy Súleıman Demırel atyndaǵy ýnıversıtettiniń 3-kýrs stýdenti.