10 qańtarda Qaraǵandy qalasyndaǵy kópqabatty turǵyn úılerdiń birinde gaz balony jarylyp, órt boldy. Oqıǵanyń mán-jaıy anyqtaldy. Osyǵan baılanysty jergilikti polısııa qylmystyq is qozǵalǵanyn málimdedi, dep habarlaıdy Egemen.kz.
TJM málimetteri boıynsha, órt shyqqan páterden er adam qutqarylyp, aýrýhanaǵa jatqyzyldy. Sonymen qatar úı ishin tekserý kezinde úsh adamnyń denesi tabyldy (boljam boıynsha eki erkek pen bir áıel).
«О́rt faktisi boıynsha polısııada QR QK 204-babynyń 2-bóligi boıynsha «Otty abaısyzda paıdalaný nemese asa qaýipti ózge de kózdermen aýyr zardaptarǵa ákep soqtyrǵan bótenniń múlkin abaısyzda joıý nemese búldirý» boıynsha qylmystyq is tirkeldi», delingen oblystyq PD baspasóz qyzmeti taratqan habarlamada.
Atalǵan baptyń sanksııalary 2 myń aılyq eseptik kórsetkishke deıingi mólsherdegi aıyppulmen ne sol mólsherdegi túzeý jumystarymen ne eki jylǵa deıingi merzimge bas bostandyǵynan aıyrý jazasyn kózdeıdi.