27-29 qańtar kúnderi Portýgalııanyń Almada qalasynda dzıýdoshylardyń Gran-prı týrnıri ótedi. Bul jarysta Qazaq eli namysyn 27 balýan qorǵaıdy.
Erler básekesinde kóbine-kóp ekinshi jáne úshinshi nómirli sportshylarǵa senim artylǵan eken. Al myqtylar arasynan tek Jansaı Smaǵulov (73 kılo) pen Dıdar Hamzany (90 kılo) ǵana kóremiz. Ekeýi de qurlyqtyq deńgeıdegi jarystarda daralanyp, Olımpııa oıyndary men álem chempıonattarynda bir emes, birneshe márte baq synady. Al ózge salmaq dárejelerinde Qanat Seıilhan (60 kılo), Suńǵat Jubatqan (66 kılo), Aıbolat Ystybaı (66 kılo), Ańsarbek Ǵaınýllın (73 kılo), Abylaıhan Jubanazar (81 kılo), Bekádil Shaımerdenov (90 kılo), Erasyl Janataev (90 kılo), Bekarys Sádýaqas (100 kılo), Bekzat Shaǵataev (100 kılo), Jambyl Turǵynalıev (+100 kılo) jáne Ádil Orazbaev (+100 kılo) kúsh synasady.
Áıelder arasyndaǵy jarystaǵy basty úmitimiz Ábıba Ábýjaqynova ekeni sózsiz. Asa jeńil salmaqta beldesip júrgen qazaq qyzy byltyr Tashkentte uıymdastyrylǵan álem chempıonatynda qola medaldy moınynda jarqyratty. Pıreneı túbeginde Ábıbadan bólek, taǵy 13 burymdymyz tatamıge shyǵady.