2018 jyldyń 1 qańtarynan bastap zeınetke shyqqan zeınetkerlerge BJZQ-dan bólinetin tólemder kólemi 5%-ǵa ulǵaıdy, dep habarlaıdy Egemen.kz.
Qordan beriletin tólemder Qazaqstan Respýblıkasy Úkimetiniń 2013 jylǵy 2 qazandaǵy № 1042 qaýlysymen bekitilgen ádistemege sáıkes júzege asyrylady.
BJZQ baspasóz qyzmeti habarlaǵandaı, qoldanystaǵy Ádistemege saı zeınetke shyqqan azamattarǵa beriletin tólemder kelesideı esepteledi: tólem ala bastaıtyn alǵashqy jyly zeınetaqy jınaqtarynyń somasy zeınetaqy jınaqtarynyń 6,5% tólem mólsherlemesine kóbeıtiledi jáne 12-ge bólinedi.
«Belgili bir sanattaǵy alýshylar, ıaǵnı merzimsiz belgilengen 1 nemese 2 toptaǵy múgedektigi bar adamdar, sondaı-aq zııandy jáne qaýipti óndiristerde jumys istegen, jınaqtary jıyntyǵynda keminde alpys aı mindetti kásiptik zeınetaqy jarnalary esebinen qalyptastyrylǵan adamdar úshin Ádistemede aı saıynǵy zeınetaqy tóleminiń mólsherin arttyratyn túzetý koeffısıentteri kózdelgen. Joǵaryda kórsetilgen sharttardyń ekeýin de qanaǵattandyratyn tulǵalar úshin, osy eki jaǵdaıdaǵy neǵurlym joǵary mánge ıe túzetý koeffısıenti qoldanylady», delingen BJZQ habarlamasynda.
Bul rette BJZQ-dan aı saıynǵy zeınetaqy tólemi respýblıkalyq bıýdjet týraly zańda tıisti qarjy jylyna belgilengen eń tómengi kúnkóris deńgeıiniń keminde 70% mólsherinde júzege asyrylady. Aıta ketsek, 2023 jylǵy eń tómengi kúnkóris deńgeıi – 40 567 teńgeni quraıdy. Tıisinshe, jyl basynan beri BJZQ-dan beriletin eń tómengi tólem mólsheri 8,5%-ǵa ulǵaıyp, 28 396,9 teńge (70% * 40 567) boldy.
Kelesi jyldary aı saıynǵy zeınetaqy tóleminiń mólsheri zeınetaqy tólemderin ındeksteý mólsherlemesi 5%-ǵa ulǵaıyp otyrady.
«Eger ótinish berilgen kúngi zeınetaqy jınaqtarynyń somasy tıisti qarjy jylyna arnalǵan respýblıkalyq bıýdjet týraly zańda belgilengen eń tómengi zeınetaqynyń on eki eselengen mólsherinen aspaǵan jaǵdaıda, bul soma alýshyǵa BJZQ-dan bir ret, biraq tólenedi (2023 jyly birjolǵy zeınetaqy tóleminiń mólsheri – 636 912 teńge = 12 * 53 076 teńge). BJZQ-dan zeınetaqy tólemderin alý quqyǵyn 2018 jylǵy 1 qańtarǵa deıin iske asyrǵan tulǵalarǵa tólemder zeınetaqy tólemderi taǵaıyndalǵan sátte qoldanysta bolǵan Ádisteme boıynsha esepteledi: jyldyq zeınetaqy tóleminiń somasy eń tómengi zeınetaqynyń otyz eselengen eń joǵary mólsheri (2023 jyly – 1 592 280 teńge = 30*53 076 teńge) men alýshynyń tıisti jasyndaǵy zeınetaqy jınaqtarynyń aǵymdaǵy qunynyń koeffısıentine zeınetaqy jınaqtary somasynyń kóbeıtindisi retinde eseptelgen shamalardan aspaıdy», delingen habarlamada.