Sońǵy jyldary dızel otynynyń tapshylyǵy máselesi ózekti bolyp otyr. Janar-jaǵarmaı tek talon men karta boıynsha nemese tipti shekteýli kólemde ǵana satylǵan kezder de bolǵan, dep jazady Egemen.kz.
Senator Baqytjan Baıahmetovtiń aıtýynsha, elimizdegi iri úsh munaı óńdeý zaýytynda óndiris problemasyna baılanysty jyl saıyn munaı ónimderiniń tapshylyǵy baıqalady. Depýtat buǵan kórshi elderdegi otyn baǵasy da sebep bolatynyn, óıtkeni onda bizdikinen eki ese qymbat ekenin, tıisinshe tranzıttik kólikterdiń yńǵaıyna qaraı jumys isteıtinin jetkizdi.
Senator 2025 jylǵy 1 qańtardan bastap EAEO aıasynda munaı men munaı ónimderiniń biryńǵaı naryǵynyń normasy engiziletinin eske saldy. Oǵan bizdiń elden basqa Reseı men Qyrǵyzstan kiredi, olarda otyn baǵasy joǵary.
Osyǵan baılanysty Baqytjan Baıahmetov Premer-mınıstr Álıhan Smaıylovtyń atyna depýtattyq saýal joldady.
«Úsh iri munaı óńdeý zaýytynyń óndiristik qýatynda barynsha jumys isteýin eskere otyryp, Úkimet munaı ónimderi óndirisiniń ósýin yntalandyrý úshin qandaı sharalar qabyldaýdy josparlap otyr? Qazaqstan men onyń kórshileri arasyndaǵy dızel otyn baǵasynyń jalǵasyp kele jatqan teńsizdigine qatysty Úkimettiń kózqarasy qandaı? Únemi bolyp turatyn munaı ónimderi men dızel otynynyń tapshylyǵy máselesin sheshý úshin Úkimettiń orta merzimdi nemese uzaq merzimdi jospary bar ma?», delingen Baıahmetovtyń depýtattyq saýalynda.