Jýyrda qoǵamdyq oryndarda balaǵat sóz aıtqan azamattarǵa iri aıyppul salynatyny jaıly belgili boldy. Sońǵy kúnderi áleýmettik jeli qoldanýshylary bul taqyrypty qyzý talqylap jatyr, dep habarlaıdy Egemen.kz Polisia.kz-ke silteme jasap.
Bul rette QR IIM ÁPK basqarma bastyǵynyń mindetin atqarýshy Azamat Qurymbaev balaǵat sózderdi qoldanǵandarǵa qarastyrylatyn jaza túrleri jaıynda aıtyp berdi.
«Qazaqstan zańnamasynda balaǵat sózder úshin jaýapkershilik burynnan kózdelgen. Máselen, qorlaý, ıaǵnı basqa adamnyń ar-namysy men qadir-qasıetin ádepsiz túrde qorlaý – bul qylmystyq teris qylyq. Ony jasaǵany úshin jaýapkershilik 100 AEK-ke deıin aıyppul túrinde nemese 120 saǵatqa deıin túzeý, ıa bolmasa qoǵamdyq jumystar túrinde kózdelgen. Budan ári quqyq buzýshymen otbasylyq-turmystyq qatynastarda turǵan adamdarǵa aıqyn qurmetsizdik bildiretin jáne qylmys quramyn qamtymaıtyn balaǵat sózder men basqa da áreketter ákimshilik quqyq buzýshylyq týraly Kodekstiń 73-baby boıynsha ákimshilik jaýapkershilikke ákep soǵady. Jaza sot arqyly eskertý nemese 5 táýlikke deıin qamaqqa alý túrinde bolýy múmkin», dedi Azamat Qurymbaev.
Onyń aıtýynsha, usaq buzaqylyq úshin ákimshilik jaýapkershilik qoǵamdyq oryndarda, aınalasyndaǵylarǵa syılamaýshylyq bildirý, sondaı-aq qoǵamdyq tártip pen azamattardyń tynyshtyǵyn buzyp, balaǵat sózder aıtylǵan jaǵdaıda ǵana týyndaıdy.
«Osy jyldan bastap usaq buzaqylyq jasaǵany úshin jaza kúsheıtiledi. Bul qoǵamdyq tártipti buzýdyń jolyn kesý maqsatynda jasaldy. Qazir avtobýsta bireý balalardyń nemese aǵa býyn adamdardyń kózinshe, ıaǵnı qoǵamdyq orynda, aınalasyndaǵylarǵa syılamaýshylyq bildirip, qoǵamdyq tártipti buzyp, balaǵat sózder aıtqan jaǵdaıda, bul úshin aıyppul 17 250 teńgeni quraıdy nemese 10 táýlikke deıin qamaýǵa alynady. 6 naýryzdan bastap mundaı áreketter úshin 20 AEK (69 myń tenge túrindegi jaza) aıyppul nemese 5-ten 15 táýlikke deıin qamaýǵa alý kózdelgen», dep túsindirdi spıker.
Bul rette, adamdar bir-birine jalǵan aıyp taqpaýy úshin shaǵymdanýshy polısııa qyzmetkerlerine naqty dáleldemeler usynýy qajet. Bul - azamattardyń ótinishi, kýágerlerdiń aıǵaqtary, sondaı-aq quqyq buzýshylyqtyń aýdıo nemese beınetúsirilimi, qajet bolǵan jaǵdaıda sarapshynyń qorytyndysy. Quqyqtyq baǵany sot beredi.
«Áleýmettik jelilerde balaǵat sózder aıtqany úshin, eger bundaı áreketter qoǵamdyq oryndarda nemese aınalasyndaǵylarǵa syılamaýshylyq tanytyp, azamattardyń tynyshtyǵyn buzsa, bul usaq buzaqylyq babymen qarastyrylady. Jalpy qaı tilde bolmasa da balaǵat sózder aıtqany úshin jaýapkershilik qarastyrylady», dep qorytyndylady Azamat Qurymbaev.