Prezıdent Is basqarmasynyń medısınalyq ortalyǵynyń Aqtóbe qalasyndaǵy kúnderi bastaldy. Týr aıasynda ortalyqtyń bilikti dárigerleri hırýrgııa, terapııa, allergologııa, arıtmologııa, genomdyq dıagnostıka, ımmýnologııa, neırohırýrgııa jáne basqa salalar boıynsha turǵyndarǵa kómek kórsetedi.
Atalǵan is-sharanyń alǵashqy kúni neırohırýrg Myńjylqy Berdiqojaev neırohırýrgııalyq beıindegi aýrýlary bar 30 naýqasqa konsýltasııalyq qabyldaý júrgizdi. Onyń 7,2%-y aýyldyq jerlerdiń turǵyndary. Sondaı-aq 4-5 kún buryn ınsýlt alǵan 55 jastaǵy pasıentke bas mıynyń ishindegi omyrtqa arterııasynyń tarylýyna baılanysty stend qoıý operasııasyn jasady. Osy tektes operasııalar is-shara aıasynda 2 kún qatarynan júrgizilmek. Jalpy, ótkiziletin operasııalardyń sany – 10-ǵa jýyq. Oǵan qosa shuǵyl kelip túsken naýqastarǵa da operasııa jasalýy múmkin.
Is-sharanyń ǵylymı bóliminde tanymal neırohırýrg Myńjylqy Berdiqojaev «Serebraldy anevrızmany emdeý» taqyrybynda baıandama oqıdy. Dáriger óz baıandamasynda Almaty qalasyndaǵy «Ortalyq klınıkalyq aýrýhana» AQ-nyń Neırohırýrgııa ortalyǵynyń keıingi jeti jyldyq tájirıbesindegi mı qantamyrlary anevrızmasynyń jarylýynyń aldyn alý, ony emdeýde engizilgen túrli ádisteri týraly aıtady.
Osynaý sapar barysynda Prezıdent Is basqarmasynyń medısınalyq ortalyǵy aýrýhanasynyń dárigerleri medısınanyń basqa da baǵyttary boıynsha tájirıbe almasyp, Prezıdenttik klınıkanyń kóptegen qyzmetimen tanystyrady.