19 aqpanda Astanada «Burqasyn-2023» qysqy festıvali ótedi, dep habarlaıdy Egemen.kz elorda ákimdiginiń resmı saıtyna silteme jasap.
Atalǵan is-shara jyl saıynǵy qysqy festıval baǵdarlamasy aıasynda sporttyń 10 túrinen ótedi. Olar: shańǵy jarysy, gir tasyn kóterý, qol kúresi, belbeý kúresi, arqan tartys, pımaly hokkeı, qarmen nysanany dáldep atý jarysy, avtosport, motosport, qysqy fýtbol.
Jarysqa qatysýǵa densaýlyǵy jaramdy kez kelgen adam qatysa alady. Tirkeýden ótý kezinde ózimen birge jeke basyn kýálandyratyn jeke qujaty qajet.
Shańǵy jarysyna tirkelý kestege sáıkes sóreden 30 mınýt buryn, ótkizý ornynda uıymdastyrylady. Qatysýshylardyń starttyq nómirleri ár jas toby boıynsha sóreden 30 mınýt buryn beriledi. Jarys sanıtarlyq normalar men qaýipsizdik tehnıkasyn saqtaı otyryp júrgiziledi.
Ár jas tobyndaǵy jeńimpazdar men júldegerler dıplomdarmen, medaldarmen jáne baǵaly syılyqtarmen marapattalady.
Qysqy festıval 19 aqpan kúni saǵat 11:00-de Esil ózeni, Amfıteatr janynda bastalady.