Byltyr jyl sońynda eldegi bank kartalarynyń sany 64,4 mln-ǵa jetti. Sóıtip, 2021 jyldan beri 9,9 paıyzǵa kóbeıdi. Kartalardyń 33 mıllıony belsendi túrde qoldanylypty. Debettik kartalar da, nesıe kartalary da belsendi ósim kórsetip otyr. Al 2022 jyldyń 11 aıynda qolma-qolsyz jasalǵan tólem kólemi tólem kartalary boıynsha jıyntyq qarjy aınalymynyń 82 paıyzyn quraǵan.
64,4 mln kartany búkil qazaqstandyqqa bóler bolsaq, sábılerdi qosa eseptegende ár turǵynǵa eki bank kartasynan tıesili bolyp shyǵady. Al ekonomıkalyq belsendi halyqqa shaqqanda – úsh jáne odan da kóp kartadan tıesili.
«Osydan birneshe jyl buryn Gold/Platinum klasyndaǵy kartalar kez kelgen adam úshin qoljetimdi emes edi. Al qazir azamattarymyz úshin premıým segmenttegi kartalardyń (Visa Infinite / Mastercard World Elite / Union Pay Diamond jáne basqalar) ózi tańsyq emes. Mundaı klastaǵy kartalardy elimizde 8 ekinshi deńgeıli bank usynady», deıdi Ranking sarapshylary.
Naryqtaǵy 4 bank qana metall kartalaryn aınalymǵa shyǵarǵan. – Altyn Bank, Jusan Bank jáne «Bank SentrKredıt» Visa Infinite metall kartasyn usynsa, «Eýrazııalyq bank» klıentteri Visa Infinite men Mastercard World Elite arasynda tańdaý jasaı alady.
«Tek Altyn Bank 7 mln teńgege deıingi shekti somasy ári kredıttik ári debettik jan-jaqty karta usyna alady. Banktiń kez kelgen klıenti premıým karta asha alady. Tórt bankte de metall karta ashqany úshin ustalatyn komıssııa kólemi – 30 myń teńge. Jyldyq qyzmet kórsetý boıynsha eń tıimdi shart ta Altyn Bank-te: aıyna 2,5 myń teńge nemese jylyna 30 myń teńge. «Bank SentrKredıt» pen Jusan Bank-tiń qyzmet kórsetý quny aıyna – 10 myń, jylyna 120 myń teńgege shyǵady. «Eýrazııalyq banktiń» qyzmet kórsetý shartyndaǵy komıssııa baǵasy – jylyna 240 myń teńge», delinedi Ranking sholýynda.
Altyn Bank-tiń VIP-klıentteri jáne osy bank kartasy arqyly jalaqy alatyn azamattar úshin kez kelgen bankomattan aqsha sheship alý komıssııasyz júzege asyrylady. Qarapaıym klıentter bul banktiń kartasy arqyly 1 mln teńgege deıin qarajatty komıssııasyz sheshe alady. Odan ári qaraı komıssııa – somanyń 1 paıyzyn qurap otyrady.
«Bank SentrKredıttiń» el aýmaǵyndaǵy barlyq bankomattaryndaǵy komıssııasyz beriletin shekti soma – 3 mln teńge. Odan ári qaraı alynǵan somanyń 1 paıyzy ustalady. «Eýrazııalyq bankte» óz jelisi boıynsha shekti soma – 5 mln, basqa jeliler (basqa bankterdiń bankomatynan alynsa) boıynsha 2 mln teńge dep bekitilgen. Jusan Bank-tiń shekti somasy – 1 mln teńge. Odan assa – 1 paıyz komıssııa kúshine enedi.