«Qazaqstan halqyna» qory men Turaqty bilim berýdi damytý qorynyń «Aýyldyq jerlerdegi tirek mektepterdiń áleýetin damytý» qaıyrymdylyq baǵdarlamasy aıasynda Bórli aýdany Aqsaı qalasynyń №5 jalpy bilim beretin mektebinde 35 oqý kabıneti men sheberhanasy jańartyldy, dep habarlaıdy Egemen.kz.
Baǵdarlama aıasynda robototehnıka jáne ınformatıka kabınetteri, Intellectum holl, STEM-zerthana, ART-stýdııa, telestýdııa ashyldy. Mektep kitaphanasy muǵalimder, oqýshylar jáne tipti ata-analar úshin qosymsha bilim berý resýrstyq alańyna aınaldy.
Baǵdarlama úzdik pedagogıkalyq tájirıbeler men ádistemelerdi engizý, tirek mektepterdi qajetti materıaldyq-tehnıkalyq bazamen qamtamasyz etý arqyly aýmaqtyq jáne áleýmettik-ekonomıkalyq belgiler boıynsha bilim berý sapasynyń alshaqtyǵyn qysqartýǵa járdemdesýge baǵyttalǵan.
«Búginde aýyldyq jáne qalalyq mektepter arasynda alshaqtyq baıqalady. Bilim berý sapasy, ásirese, aýyldy jerde tómendep keledi. Bul máseleni júıeli jáne keshendi sheshý úshin «Qazaqstan halqyna» qory seriktestermen birlese aýyldyq tirek mektepterdi damytý týraly sheshim qabyldap, olardyń is júzinde quzyrettilik ortalyqtaryna aınalyp, basqa mektepterdegi oqytý sapasyn arttyrýǵa yqpal etýi kerek. «Aýyldyq jerlerdegi tirek mektepterdiń áleýetin damytý» baǵdarlamasy aıasynda biz 17 aýyldyq tirek mektepterdi jabdyqtaımyz jáne olarǵa ádistemelik qoldaý kórsetemiz. Búgingi tańda óńirlerde 10 mektep jaraqtandyryldy. Osylaısha ol oqý oryndaryndaǵy bilim men daǵdylar jaqyn mańdaǵy shaǵyn komplektili mektepterge baǵyttalady. Sebebi, bul mektepterde materıaldyq-tehnıkalyq baza men kadr máselesi óte ózekti», dep atap ótti «Qazaqstan halqyna» qoǵamdyq qory Basqarma tóraǵasynyń orynbasary Lázzat Shyńǵysbaeva.
Materıaldyq-tehnıkalyq bazany jańartý qor qarajaty esebinen jalpy somasy 249,8 mln teńgege júzege asyryldy.
«Bizge jańa mektebimiz unaıdy. Barlyǵy ádemi, jańa qural-jabdyqtar bar. Úzilis kezinde biz túrli oıyndar oınaımyz. Kitaphanada kitap oqýmen birge ýaqytty tıimdi ótkizemiz. Bizdiń mektep – eń úzdik», dedi 3 synyp oqýshysy Dana Anarbekova.
Sonymen birge, jobanyń seriktesteri – Bilim berýdi turaqty damytý qory men «Nazarbaev Zııatkerlik mektepteri» DBBU mekteptegi bilim berý ortasy men oqytý sapasyn taldaý boıynsha jumystardy aıaqtady. Taldaý nátıjeleri negizinde mektepti damytý, bilim berý sapasyn arttyrý boıynsha usynystar tizbelendi, sondaı-aq muǵalimderge qajetti biliktilikti arttyrý kýrstary anyqtaldy.
«Jobamyz bes mindetti oryndap otyr. Olar – aýyldyq mektepterde oqytý tehnologııalaryn jetildirý, tirek aýyldyq mektepterdi materıaldyq-tehnıkalyq jaraqtandyrý, tirek mektepterdiń tájirıbesin óńir mektepterine, onyń ishinde shaǵyn jınaqty mektepterge taratý. Tórtinshisi – mektepti aýyldyń komıýnıtı ortalyǵy retinde damytý. Besinshi – jaýapkershilik pen beı-jaı qaramaýshylyq sııaqty qoǵamdaǵy minez-qulyqtyń jańa modelin belgileıtin qundylyqtardyń durys júıesi bar qamqor qazaqstandyq qoǵamdastyqty qalyptastyrý», deıdi Bilim berýdi turaqty damytý qorynyń dırektory Danııar Toqtarbaev.