Gollandııa chempıonnyń tas-talqanyn shyǵardy

Búgin tań aldynda aıaqtalǵan Ispanııa men Gol­landııa arasyndaǵy oıynda álem chempıo­na­ty­nyń eń alǵashqy sensasııasy tirkeldi. Onda «Qyzǵaldaqtar eliniń» komandasy jahannyń qa­zir­gi chempıonyn 5:1 etip oısyrata utty. Al so­dan sál buryn, 13 maýsym kúni túnde Meksıka men Kamerýn kezdesip, bulardyń aldyńǵylary 1:0 ese­bimen jeńiske jetken edi. Matchtyń basy ıspandar úshin tym dabyl qaǵarlyqtaı bolyp bastalǵan joq. Kerisinshe Pıreneı túbeginiń jigitteri áriptesterine qaraǵanda, aı­tar­lyqtaı shıraq ta senimdi kó­rindi. Olar birinshi qaýipti shabýyldy óz qaqpalaryna jasatyp alǵandary bolmasa, negizinen qysymdy ózderi jasap jatty. Sondyqtan kezdesýdiń 27-mınýtynda Dıego Kostanyń qarsylastar aıyp alańynda kúmándi jaǵdaıda qulap qalǵany úshin belgilengen penaltı arqyly Habı Alonso soqqan gol onshalyqty se­nim­di bolyp kórinbegenimen, oıyn­nyń mazmuny boıynsha olar­dyń basym ekenine de kádim­gideı ılanyp-aq otyr edik. Budan keıin qaqpashy Iker Ka­sılıastyń anyq qateliginen 44-mınýtta Robın van Persı esepti teńestirip ketken kezde de, muny ýaqytsha nárse sekildi sezingenimiz ras-tyn. Alaıda, ekinshi taımnyń basynan naǵyz naızaǵaı uryp, jasyn jarqyldaǵan oıyndardy tanytqan Gollandııa fýtbolshylary bul túısikti túgel tas-talqan etip jiberdi. Sol daýyldyń basyn 52-mınýtta Aren Robben bastap berdi. Budan keıin 64-mınýtta Stefan de Vreıge bir ret kezek berip alǵan aldyńǵy eki fýtbolshy – van Persı men Robben taǵy bir-bir márteden (72, 80-mınýttar) qaqpashyny jazalap shyqty. Sóıtip, esepti 5:1-ge jetkizdi. Osynyń aldynda ótken Meksıka men Kamerýn kezde­sýinde de tóreshiniń júgensizdigi birden kózge urdy. Bul rette kolýmbııalyq arbıtr Vılmar Roldan Horvatııa quramasy qaqpasyna kúmándi penaltı belgilegen japon Iýıtı Nısımýradan da asyp tústi. Ol «oıynnan tys jaǵdaı» de­gen jeleýmen úsh birdeı dop­tyń darbazaǵa túskenin tán almaı tastady. Eger bul tus­ta kamerýndyqtar shynymen ofsaıdta qalyp qoıǵan bol­sa, meksıkalyqtardyń soqqy­lary­men salynǵan eki gol da taza edi. Degenmen, joǵary ádildik bar eken, aqyrynda astek urpaqtary bir sátte sheshýshi gol soǵyp, qoldan sýsyp ketip bara jatqan jeńisti tartyp áketti. Bul kúni báriniń sońynan alańǵa Chılı jáne Avstralııa quramalary shyqty. Serik PIRNAZAR, «Egemen Qazaqstan».