Astanada alǵash ret kúmis deńgeıdegi Astana Meeting World indoor tour ótti. Bundaı deńgeıdegi jarysty TMD elderi arasynda Qazaqstan alǵash ret ótkizdi. Oǵan 100-ge jýyq sportshy qatysty, dep habarlaıdy Egemen.kz.
«On bes eldiń sportshylary «Astana Silver Grand Prix Meeting» týrnırine qatysý úshin Astanaǵa arnaıy keldi. Mundaı jarysty ótkizý mártebesine bıyl bizden bólek, AQSh, Germanııa, Fransııa, Serbııa, Slovakııa, Chehııa memleketteri ıe bolǵan», dedi Jeńil atletıka federasııanyń prezıdenti Danıal Ahmetov.
Mádenıet jáne sport mınıstri Ashat Oralovtyń aıtýynsha, atalǵan týrnır otandyq jeńil atletıkany damytýda úlken serpin berip, sportshylar arasyndaǵy básekelestikti arttyrady.
«Dúnıejúzilik jarysqa álemniń 15 elinen sportshylar qatysty. Bul degenimiz, jeńil atletıkanyń ǵana merekesi emes, jalpy elder arasyndaǵy yntymaqtastyqtyń da týyn bıiktetetin is-shara dep oılaımyn», dedi Ashat Oralov.
Týrnırge qatysýshylar jeńil atletıkanyń 10 túrinen ózara myqtyny anyqtady. Erler arasynda 60 metrge kedergilermen júgirý jarysynda márege birinshi bolyp kelgen kýbalyq Rodjers Irıbarn (nátıjesi 7.62sekýnd) otandasymyz Davıd Efremovtan sál ǵana ozyp (7.65sek) ketti. Aıtpaqshy, munyń aldynda Davıd Efremov aldyn-ala júgirý kezinde 7,62 sekýnd nátıjesimen dál osy baǵdarlamada Qazaqstan rekordyn jańartqan bolatyn.
Sondaı-aq erler arasynda 400 metrge júgirýden otandastarymyz Mıhaıl Lıtvın 46.41 nátıjesimen 1-oryn, Andreı Sokolov 46.74 sekýnd nátıjesimen 2-oryn ıelense, brazılııalyq Aleksandr Rýsso 47.70 sekýnd nátıjesimen máre syzyǵyn 3-shi bolyp kesti.
Áıelder arasynda 60 metrge júgirýden otandasymyz Olga Safronova (7.30sek) portýgalııalyq Arıalıs Gandýllaǵa (7.18sek) ese jiberip, máre syzyǵyn ekinshi bolyp kesti. Úshinshi orynǵa aýstralııalyq Magdalena Lınder (7.43sek) jaıǵasty.
Áıelder arasynda uzyndyqqa sekirýde ózbekstandyq Darıa Reznıchenko 6.32 metr nátıjesimen top jardy. Otandastarymyz Anastasııa Rypakova (5.89metr) 2-oryn, Alına Chıstıakova (5.84metr) júldeli 3-orynǵa jaıǵasty.
Erler arasynda 800 metrge júgirýden horvat Marıno Blýdek (1:48.23) 1-oryndy ıemdense, kenııalyq Nıkolas Kıplangat 1:48.31 nátıjesimen 2-orynǵa, al úshinshi orynǵa slovenııalyq Jan Výkovıch (1:48.72) jaıǵasty.
1500 metrge qashyqtyqqa júgirýden Djarınter Mvasıa (Kenııa) 4:14.26 nátıjesimen 1-oryn, Hırýt Meshesha (Efıopııa) 4:14.40 nátıjesimen 2-oryn, Kamıla Gomes (Portýgalııa) 4:26.63 nátıjesimen 3-oryn ıelendi.
Týrnırdiń eń tartysty dodalarynyń biri áıelder arasynda bıiktikke sekirý boldy. Nátıjesinde júldeli úsh oryndy da otandastarymyz ıelendi. Olar:
Nadejda Dýbovısaıa (1.93metr) – I-oryn;
Krıstına Ovchınnıkova (1.89metr) – II-oryn
Elızaveta Matveeva (1.89metr) – III-oryn.
Áıelder arasynda 400 metr qashyqtyqta 1-oryn Elına Mıhına (55.14sek), 2-oryn Aleksandra Zalıýbovskaıa (55.28sek), 3-oryn Krıstına Kondrashova (55.87sek) ıelendi.
Erler arasynda 60 metrge júgirýden amerıkalyq Maıkl Rodjers top jardy. Ol atalǵan qashyqtyqty 6.664 sekýnd ishinde júgirip ótti. Ekinshi orynǵa AQSh sportshysy Demek Kemp (6.665) jaıǵasty. Bul sportshylardyń nátıjesin sekýndtyń myńnan bir bóligi bóldi. Úzdik úshtikti portýgalııalyq Frederıko Kýrvelo qorytyndylady, onyń kórsetkishi 6.75 sekýnd.
Erler arasynda 3000 metr qashyqtyqqa júgirýden Alı Abdılmana (7:52.43) top jardy (Efıopııa). Ulybrıtanııalyq Aleksandr Djordj (8:07.55) kúmis medal, al qazaqstandyq Alekseı Gýsarov (8:27.10) qola medal ıelendi.