Eskilikti estelik retinde saqtap qalý úshin sýretshi ári jýrnalıst Rýslan Shaqabaev Semeıdiń kóne ǵımarattaryn qaryndashpen qaǵazǵa túsirip júrgen edi. Stıli erek, janry bólek sýretteri jınaqtalǵan soń ol Dostoevskııdiń ádebı-memorıaldyq mýzeıinde «Terezeler» atty grafıkalyq jeke kórmesin ashty.
Kórmedegi sýretterden Semeıdiń HVIII-HIH ǵasyrlarda boı kótergen jer úılerin, eski ǵımarattaryn kórýge bolady. Negizi qart qala ǵasyrdan asqan úılerimen, ǵımarattarymen erekshe. Munda keshegi Alash zııalylarynyń taby qalǵan jerler qanshama? Sonyń bárin qaz-qalpynda beınelep júrgen Rýslannyń eńbegi óte zor.
– Jyl saıyn qala jańaryp keledi. Kóne úıler súrilip, ornyna saýda oryndary sekildi qyzyldy-jasyldy ǵımarattar kóterilip jatyr. О́tken ǵasyrdaǵy úılerdiń joq degende terezeleri jańartylady. Sýretshi bolǵan soń qart qalany qaz-qalpynda qaǵazǵa túsirip, tarıhta qaldyrǵym keledi, – deıdi sýretshi Rýslan Shaqabaev.
«Terezeler» atty jeke shyǵarmashylyq kórmege Rýslan Shaqabaev 58 jumysyn usynǵan. Aıta keterligi, keıipkerimizdiń mamandyǵy sýretshi bolǵanymen, jýrnalıstıka salasynda qyzmet etip kele jatqanyna 20 jyldan asty.
Sýretshiniń týyndylarynan eskiliktiń lebi baıqalady. Beıne bir Semeı shaharyn aralap júrgendeı kúıge túsesiń. Onyń ústine, Rýslan «Tatar slabodasy» atalyp ketken qalanyń kóne aýdanynda turady. Soǵan qarap, qolyna qaryndashty qalanyń rýhyn sezinip baryp alǵan ba dersiń. Áıtpese, kópshiliktiń nazaryn aýdaratyndaı kartınalar shyqpas edi. Sýretshiniń aıtýynsha, ol áý basta úılerdiń terezelerin sala bastaǵan. Adamnyń ishki jan dúnıesi kózinde bolsa, qalanyń shynaıy tirshiligi terezelerdiń arǵy jaǵynda. Ár terezede ár- túrli taǵdyr, san túrli ómir.
SEMEI