Ulttyq kompanııalardyń ult qajetine moıyn bura bastaǵany qýantady. Onyń anyq bir dáleli, apta ortasynda «KEGOC» AQ Korporatıvtik áleýmettik jaýapkershilik jáne turaqty damý boıynsha alǵashqy qazaqstandyq salalyq bıznes-quraldyń tusaýkeserin ótkizdi. Bıznes-qural «Korporatıvtik áleýmettik jaýapkershilik – elektr energetıkalyq kompanııalar úshin: bıznes tıimdiligin arttyramyz» dep atalǵan.
Tusaýkeser rásimine arnalǵan dóńgelek ústelde «KEGOC» AQ ókili Marat Qalmenov, Qazaqstan elektr energetıkalyq qaýymdastyǵynyń tóraǵasy Shaımerden Orazalınov, Qazaqstan Azamattyq alıansynyń vıse-prezıdenti Artýr Platonov, Ortalyq Azııanyń Eýrazııa qorynyń joba menedjeri Gaýhar Qojasheva bıznes-quraldyń sala mamandary men jalpy qoǵamǵa tıgizer paıdasy men biregeıligi jóninde áńgimeledi. О́zin jobanyń avtory jáne kitaptyń redaktory dep tanystyrǵan M.Qalmenov bıznes-quraldy jasaýdaǵy basty maqsat týraly aıtty.
– Bul praktıkalyq quraldy shyǵarý arqyly «KEGOC» aksıonerlik qoǵamy, ulttyq kompanııa retinde elimizdiń, elektr energetıkasy salasynyń damýyna jáne de osy saladaǵy kásiporyndardyń Korporatıvtik áleýmettik jaýapkershilik qaǵıdattary men ıdeıalary týraly tıisti deńgeıde habardar bolýyna ózindik úlesin qosyp otyr. Bul básekelestik qabilettilikti arttyrý men turaqty damýdy qoldaýdaǵy qajetti shart, – dedi joba avtory.
Tusaýkeser rásiminde sóz alǵan A.Platonov jobanyń biregeıligi jóninde baıandady. – «KEGOC» AQ árdaıym álemdegi úzdik tájirıbelerge saı bolýǵa umtylady, sondyqtan da kompanııanyń ornyqty damý men azamattyq jaýapkershilik ustanymyn qoldaý maqsatynda óz tarapynan bastama kóterip otyr. Kompanııa basshylyǵynyń osy baǵyttaǵy jumystarǵa erekshe mán beretinin atap ótken jón. Qol jetkizgen jetistikter de osydan kelip shyǵady. Únemi qarapaıym jumysshylar men tutynýshylarynyń ıgiligi úshin tıimdi sharalarǵa muryndyq bolyp júredi. Al keıbir qorlar men kompanııalar áleýmettik jaýapkershilikti bir-eki túsindirme kitap shyǵarýmen shektelý dep túsinetini ókinishti. Bul olarǵa áleýmettik jaýapkershiligin qujatty túrde dáleldeý ǵana ekeni málim. Búgingi ótkizilip otyrǵan sharaǵa qaıta oralar bolsaq, «KEGOC» AQ-taǵy ıgi jaǵdaı múlde basqa. Byltyr iri kásipkerlik nysandar arasyndaǵy «Úzdik áleýmettik-jaýapty kásiporyn» atalymy boıynsha bas júldeni ıelenip, «Paryz-2013» syılyǵynyń laýreaty atandy.
Jıyn barysynda Qazaqstan elektr energetıkalyq qaýymdastyǵynyń tóraǵasy Shaımerden Orazalınov atalmysh bıznes-quralǵa qatysty óz pikirin bildirdi. Qazaqstan bıznesindegi sýbektiler arasynda KÁJ qaǵıdattary týraly málimettiń azdyǵy, saladaǵy tujyrymdamalardy ártúrli túsinetindigi jóninde aıta kelip, qoldaǵy bıznes-qural sol kemshilikterdiń ornyn toltyratynyn aıtty. Rasynda atalǵan kemshilikterdiń ornyn toltyrý qajettiligi – Qazaq eliniń bolashaqta Dúnıejúzilik saýda uıymyna qosylýy, Eýrazııalyq ekonomıkalyq odaq sheńberinde jaqynyraq birigýi, jáne de óz qyzmetinde áleýmettik jaýapkershiliktiń halyqaralyq standartyn básekelestik artyqshylyq retinde qoldanatyn sheteldik kásiporyndardyń Qazaqstan naryǵyna shyǵýy jaǵynan erekshe mańyzǵa ıe.
Bıznes-quraldyń tájirıbelik mańyzdylyǵy 3 shartqa negizdelgen. Birinshi, bıznes quralmen tanysa otyryp, árbir adam (tipti daıyndyǵy joq oqyrman) halyqaralyq jáne qazaqstandyq standarttar turǵysynan KÁJ qaǵıdattary men ıdeıalary týraly tolyq aqparat alyp, olardy óz jumysynda qoldana alady. Ekinshi, Qazaqstandaǵy KÁJ-di damytý erekshelikteri, sonymen qatar, 30 halyqaralyq jáne otandyq jetekshi kompanııalardyń KÁJ salasyndaǵy úzdik korporatıvtik tájirıbeleri men ǵalamdyq bastamalary týraly kóp málimetke qol jetkizedi. Úshinshi, aınalysatyn qyzmetine qaramastan, túrli uıymdar men mamandar saraptamalyq bilimderin jetildirý maqsatynda KÁJ salasyndaǵy tájirıbelik quraldar men usynymdardy erkin paıdalanýyna múmkindik týdy.
Orys jáne qazaq tilderinde jaryq kórgen bıznes-quraldyń alǵashqy taralymy 1500 danamen jaryq kórip otyr. Endigide bıznes-qural elimizdiń elektr energetıkalyq kásiporyndaryna, memlekettik organdarǵa, úkimettik emes uıymdar men joǵary oqý oryndaryna taratylady. Buǵan qosa, kez kelgen oqyrman bıznes-quralmen «KEGOC» AQ www.kegoc.kz saıtynan tanysa alady.
Bıznes-qural kompanııalardyń bıznes-strategııalary negizinde jáne múddeli taraptardyń boljamy men saladaǵy bıznes erekshelikterin esepke ala otyryp, KÁJ jumysynyń qaǵıdattaryn tolyq túsinýge múmkindik beretinine mamandar tolyq ılanyp otyr. Jalpyǵa birdeı standarttar men tájirıbeler negizinde sıpattalǵan KÁJ tásilderi men qaǵıdattaryn keshendi qoldaný bıznes, qoǵam jáne memleketimiz úshin basty maqsat – 2050 jylǵa qaraı álemniń eń damyǵan 30 eliniń qataryna qosylý mindetin júzege asyrýda básekelestik artyqshylyqqa ıe bolý múmkindigin beredi degen úmit bar.
Barlyq múddeli taraptardyń belsendi qatysýy biregeı quraldyń shyǵýyn jedeldetti deýge bolady. Rasyn aıtqanda, keshendi joba bar-joǵy 5 aıda ázirlenip jaryq kórgen. Osyǵan oraı «KEGOC» AQ KÁJ jobalary konkýrsyna qatysyp, osy bıznes-quraldy praktıkalyq jaǵynan tolyqtyrý úshin ózderiniń 35 korporatıvtik tájirıbesin usynǵan 14 kompanııaǵa alǵysyn aıtyp otyr. Solardyń ishinde, Ýkraınanyń «Razvıtıe KSO» ortalyǵyna, atalǵan quraldyń avtorlar ujymyna, kitapty ázirleý barysynda keńes bergen Qazaqstannyń KÁJ máseleleri jónindegi saraptama qaýymdastyǵyna, onyń ishinde «CSR Club in Kazakhstan» múshelerine ózderiniń aıryqsha rızalyq sezimin bildirdi.
Nurbaı ELMURATOV,
«Egemen Qazaqstan».