Pavlodar oblysynyń turǵyny Vıktorııa Cherkashına AQSh-tan satyp alǵan kóligin 10 jyldan keıin zańdastyrdy, dep habarlaıdy Egemen.kz IIM baspasóz qyzmetine silteme jasap.
37 jastaǵy áıel MINI Cooper kóligin AQSh-tan satyp alǵan.
«Men avtokólikti zańdastyrý qyzmetin alǵashqylardyń biri bolyp paıdalandym. Meniń kóligim AQSh-tan, Qazaqstanǵa sonaý 2012 jyly ákelingen. Sol kezde qoldanysta bolǵan 30% kedendik baj salyǵy tolyǵymen tólendi. Men kólikti birden tirkemedim, óıtkeni shetelge shyǵýdy josparladym. Birneshe jyl boıy elde bolmadym. Sol aralyqta qaıta óńdeý aqysy men bastapqy tirkeý úshin jańa tólemder engizilgen. Kólik qaıta óńdeý tólemi engizilgenge deıin ákelingendikten ony tóleýdiń qajeti bolmady, biraq bastapqy tirkeý úshin 500 AEK kóleminde alym tóleý qajet boldy. Soma az emes. Sondyqtan meniń kóligim garajda tura berdi», dedi ol.
Pavlodarlyq turǵyn Prezıdent avtokólikterdi zańdastyrý jáne ony ótkizý sharttary týraly jarııalaǵan kezde qýanǵanyn jasyrmady. Ol 23 qańtarda elektrondy úkimet portaly arqyly onlaın ótinim bergen. Jaýap 3-4 mınýt ishinde kelipti.
«Krımınalıster korpýstyń jáne basqa agregattardyń nómirlerin, sondaı-aq barlyq qujattardy salystyryp tekserdi. О́tinim maquldandy. Keıinirek qujattardy tapsyrdym. 10 mınýttan keıin qujattardyń daıyndyǵy týraly habarlama aldym. 10 jyldan keıin men óz kóligimdi esepke alyp, ári otbasy bıýdjetin únemdeı aldym», dedi Vıktorııa Cherkashına.
Osy rette polıseıler Qazaqstan azamattary ákelgen sheteldik eseptegi jeńil avtokólikter, shaǵyn jáne orta avtobýstar, shaǵyn júk kólikteri, basqarý organdary oń jaqta ornalasqan kólik quraldary zańdastyrýǵa jatatynyn eske saldy. Bul prosess 2023 jyldyń 1 shildesine deıin jalǵasady.