Memleket basshysy Qasym-Jomart Toqaev Joǵarǵy Sot tóraǵasy Aslambek Merǵalıevti qabyldady, dep habarlaıdy Egemen.kz Aqordanyń baspasóz qyzmetine silteme jasap.
Prezıdentke zań ústemdigin qamtamasyz etýge jáne sot tóreliginiń sapasyn arttyrýǵa baǵyttalǵan sot reformasynyń júzege asyrylý barysy týraly málimet berildi.
Joǵarǵy Sot tóraǵasy reforma jónindegi usynystardyń shuǵyl sharalar, zańnamalyq bastamalar jáne uzaqmerzimdi mindetter sekildi úsh topqa bólinetinin atap ótti.
Shuǵyl sharalar aıasynda mindetti túrde offlaın ótkizilýge tıis prosester úshin sot zaldaryn ashý, sondaı-aq anaǵurlym shetin salalar boıynsha Joǵarǵy Sottyń normatıvtik qaýlylaryn jańartý máseleleri josparlanǵan.
Aslambek Merǵalıevtiń aıtýynsha, isti sotqa deıingi qaraý satysyna tıimdi sot baqylaýyn engizý, memlekettik satyp alý, salyq salý jáne jeke sot oryndaýshylarynyń qyzmeti salalarynda ákimshilik isterdiń qaralý merzimin qysqartý máseleleri zańnamalyq bastamalarǵa jatady.
Uzaqmerzimdi jumys tártibinde keshendi zańnamalyq jáne uıymdastyrý sharalaryn ázirleý qarastyrylǵan. Qazirgi ýaqytta Parlament qaraýynda eki zań jobasy jatyr. Olar sot tóraǵalaryn saılaý arqyly tańdaý tártibin engizýge, kúshtik qurylymdardyń sýdıalarǵa qysym jasaý joldaryn joıýǵa, Joǵarǵy sot keńesiniń quzyretin kúsheıtýge jáne ıývenaldi sottardyń qaraýyna jatatyn isterdiń aıasyn keńeıtýge baǵyttalǵan.
Budan bólek, qylmystyq proseste taraptardyń jaryspalylyǵy qaǵıdatyn qamtamasyz etýge jáne zańdy óreskel buzǵany úshin sýdıalardy jaýapkershilikke tartý mehanızmderine qatysty usynystar ázirlenip jatyr.
Memleket basshysy sot júıesin odan ári jetildirý sharalaryn sapaly júzege asyrý qajet ekenine nazar aýdardy.