Túrkistan oblysynda esirtki tasymalymen aınalysqan О́zbekstan azamaty ustaldy, dep habarlaıdy Egemen.kz Polisia.kz-ke silteme jasap.
Málimet boıynsha, Túrkistan oblysynyń Saryaǵash aýdandyq polısııa bóliminiń 102 arnasyna QR UQK Shekara qyzmetinen esirtki tasymaldaý deregi boıynsha habarlama kelip túsken.
«Jibek joly» ótkizý pýnktinde qyzmettik ıtti paıdalanǵan shekaralyq narıad О́zbekstan azamatyn ustaǵan. Tekserý kezinde azamat kıiminiń qaltasynda shamamen 2 gramm bolatyn esirtki zaty bar ekenin moıyndaıdy.
Al tintý júrgizgen polıseıler kúdiktiniń syrt kıiminiń qaltasynan ishinde esirtkige uqsas zaty bar eki paketti tapty. Zertteý qorytyndysyna sáıkes pakettiń birinde salmaǵy 0,2 gramnan asatyn psıhotroptyq zaty bar ekendigi anyqtaldy. Al kelesisinde salmaǵy shamamen 0,04 gramm bolatyn geroın ekeni rastaldy.
Qazirgi ýaqytta osy jaıt boıynsha QR QK-niń 286-babynyń 2-bóligi «Aınalystan alyp qoıylǵan zattardyń nemese aınalysy shektelgen zattardyń kontrabandasy» boıynsha sotqa deıingi tergeý amaldary júrgizilip jatyr. Kúdikti qamaýǵa alyndy.
Oqıǵanyń tolyq mán-jaıy anyqtalyp jatyr.