Mektepte er muǵalim kóp emes. Saýsaqpen sanarlyqtaı azdyń biri – Islam Qadyrov. Qazir ol Atyraý qalasyndaǵy №41 mektep-gımnazııasynda aǵylshyn tilinen dáris beredi.
Islam ár sabaǵyn oqýshy júreginde saqtalatyndaı erekshe ótkizýge tyrysady. Sabaqty kúntizbelik jospardyń aıasynda qaldyrmaı, oqýshylardy sergitýdiń tyń jolyn tapqan. Ár kúngi sabaǵynyń vıdeosyn TikTok áleýmettik jelisine júkteıdi. Onyń vıdeolaryn myńdaǵan oqyrman tamashalap, qyzyǵýshylyq tanytyp júr.
– Maqsatym – balalarǵa ózge tildi ońaı meńgertý. Bul úshin jan-jaqty izdenip, erkin formatta sabaq ótkizemin. Oqýshylarmen erkin áńgimelesemin. Áleýmettik jelini jıi qoldanatyn oqýshylardy kúndelikti jospardaǵy sabaqpen qyzyqtyrý qıyn. Sol sebepti kún saıyn sabaǵymdy oıyn formatynda ótkizýdi qolǵa aldym, – deıdi jańashyl ustaz.
Ol qazir jurtshylyq jıi qoldanatyn TikTok jelisin utymdy paıdalanyp otyr. Osylaısha, oqýshylardyń bilimge talpynysyn oıatýdy kózdegen. Jas urpaqtyń sapaly bilim alýy úshin «Ata-ana, mektep jáne muǵalim» úshtiginiń bir-birimen tyǵyz baılanysta jumys istegenin qalaıdy.
Atyraý oblysy