Qazaqstan sınoptıkteri aldaǵy úsh kúnge arnalǵan aýa raıy boljamyn usyndy. Boljamǵa sáıkes, eldiń basym bóliginde qatty jaýyn-shashyn, kóktaıǵaq jáne tuman kútiledi, dep habarlaıdy Egemen.kz.
«Qazgıdromet» RMK baspasóz qyzmeti habarlaǵandaı, Qazaqstan aýmaǵynyń basym bóliginde aýa raıynyń turaqsyz sıpaty saqtalady.
«9 aqpanda eldiń ońtústigi men ońtústik-shyǵysynda qatty jaýyn-shashyn kútiledi, al 10 aqpanda qatty qar jaýady. Sondaı-aq atalǵan óńirlerde kóktaıǵaq bolady dep boljanyp otyr», delingen habarlamada.
Sondaı-aq respýblıka boıynsha tuman, tómen qarly boran jáne jeldiń kúsheıýi kútiledi.
«11 aqpanda ońtústik pen ońtústik-shyǵysta jaýyn-shashyn birtindep toqtaıdy, dese de túnde aýa temperatýrasy -8-21 gradýs aıazǵa deıin tómendeıdi», delingen mamandardyń boljamynda.