Qystyń da qyzyǵy mol

Bar múmkindikti oısha saraptap baǵamdasańyz, tabıǵaty tamyljyǵan ólkede jadyraǵan jaz aılarynda ǵana emes, shyńyltyr, qurǵaq aıazdy, aıaq basqan saıyn kirshiksiz taza, aq qary syqyr-syqyr etip, qysqy dalanyń ádemi ánin salatyn osy bir aımaqtyń ózgeshe óńdi kezinde alańsyz demalsańyz qur atqa mingendeı qýnap sala berer edińiz. Asylynda, jaz boıy kelimdi-ketimdi kisi dúmep, Býrabaıynyń baýraıy býyrqanyp, Zerendiniń zerli omyraýy júz san týrıstke tolyp ketetin aımaq qystygúni de qonaq kútýden kende emes.

Jalpy, oblysta 300-den asa demalys orny bar desek, sol nysandardyń 60 paıyzǵa jýyǵy qysqy týrızm baǵy­tynda tııanaqty jumys isteıdi. Demek, kórikti Kókshetaý, qunarly Qorǵaljyn óńirleri jyl boıy bir damyl tappaıdy. Sózimiz dáleldi bolýy úshin bir ǵana derek keltire ketelik. Eger talaıdy tamsandyrǵan osy bir ajarly aımaqqa bir jylda mıllıonnan asa týrıst at arytyp jetetin bolsa, sol adamdardyń 30 paıyzdan astamy qysta keledi. Iаǵnı keıingi jyldary sala ózgeshe serpin alyp, bar isin jańa zamannyń talabyna saı etip, órkenıetti elderdegideı tájirıbe jınaqtaı bastaǵan. Sóz arasynda «Rixos Borovoe», «Windham Garden», «Sultan Plaza», «Park Haýs Kókshetaý», «Terrassa Park» qonaq­úıleri men «Oqjetpes», «Almaz», «Shýchın­skıı», «Zeren» sanatorııleri, «Jum­baqtas» pansıonaty jáne basqa da nysandar qysqy maýsymda týrısterdi tartý úshin kórsetiletin qyzmetterdiń sanyn kóbeıtip, qyzmetin jaqsartyp keledi. Bir aıta keterligi, týrısterdiń tabıǵatty tamashalap, sergýi ǵana emes, sondaı-aq aýrýdyń aldyn alý, densaý­lyǵyn nyǵaıtý baǵytynda da minsiz qyzmet kórsetiledi.

Kúni keshe jaman tumaýdyń jalpaq álemdi bir qaýyzdyń ishine syıǵyzǵany bárimizge málim. Daýasyz derttiń sa­qynyn sylyp tastaý úshin kóptegen shıpa­jaı tynys alý jáne júrek-qan tamyrlaryn emdeıdi. Bul oraıda sý jáne balshyq, ınemen emdeý tárizdi emdik sha­ralar qoldanylady. Koronavırýspen aýyryp turǵan adamdar arasynda taza aýa­men demalýǵa qushtarlar kóbeıdi. Olar­dyń boıyndaǵy atalǵan derttiń zardaptaryn joıýǵa bizdiń em-domnyń áseri mol ekenin aıtady shıpajaı dárigerleri.

Qazirgi týrıstiń talaby kúshti. Son­dyqtan bar qolaıly jaǵdaıdy týǵyzǵan abzal. Qysy-jazy at basyn tireıtin týrısterge jaıly demalysty qamtamasyz etý úshin óńirdiń shıpajaılarynda aına­daı jaltyraǵan muz aıdyndary qu­ıyldy, shańǵy baǵyttary salyndy. Shań­ǵy, konkı, snoýbord tárizdi jab­dyq­tardy jalǵa beretin oryndar ashyl­dy. Býrabaıdyń baýraıy kóki­regińdi taza aýaǵa ǵana toltyryp qoı­maıdy, sonymen birge el tarıhyn ek­shep júrgen adamdardyń jadyna da jaqsy estelik syılaıtyny bar. Tý­ǵan eldiń appaq peıilindeı aqshań­qan jamylǵy jamylǵan, atshaptyrym jerden munartyp kórinetin taý silem­deriniń qoınaýy – tunǵan tarıh. Alash­tyń keshegi kúngi tól tarıhy jaq­par-jaqpar tastardyń betinde tań­ba­lanǵandaı, qoınaýynda kilkildep buǵyp jatqandaı. Kóńiliń aýsa kel de kór, ótkendi tany, ónegesin uq. Áne kóz ushyńda qylańdaǵan bederi bólek, beınesi kórkem Bólektaý, sál ári­rekte alýan túrli ańyzben ádiptelgen Kene­sary úńgiri. Qaqaǵan qystyń ózinde úńgir­diń aýzynan jan dúnıeńdi shymyrlatatyn jyly bir lep esip turǵandaı. Shymyrlaı qaınap, órtteı lapyldap qa­nyńa qýat beredi. Úńgir túbinde tunyp qalǵan óz zamanynyń asyl per­zent­teriniń asqaq armanynyń, mándi maq­satynyń syryn uǵatyn qýat bar. Qysqa qaıyryp aıtqanda, Býrabaıdyń baýraıynda múlgigen tynyshtyq, maý­jyraǵan tabıǵattyń aıasynda dema­lys pen rýhanı qajettilikti óteý múm­kindigin ushtastyrýǵa ábden bolady. Qonaq­úılerdiń aýmaǵynda oıyn-saýyq keshenderi jumys isteıdi. Al ekstre­maldi demalys áýesqoılary úshin jyl boıy úzbeı jumys isteıtin veık-parktiń esten ketpes qyzyǵyn kúndi túnge, túndi kúnge ulastyryp jyrlaýǵa bolar edi. Bul – elimizdegi jyl boıy úzbeı ilkimdi isin sátimen sabaqtap otyrǵan alǵashqy park.

Halyqaralyq deńgeıdegi jarys­tar da jıi ótkiziledi. Shýchınsk qalasyndaǵy shańǵy sportynyń respýblıkalyq baza­synyń aýmaǵynda talaıdy tamsandyrǵan dodalardyń dúrmegi shartarapqa je­tip jatyr. Kásibı shańǵy áýesqoılary «Elikti Park» jáne «Nur Taý» taý shań­ǵysy bazalarynyń múmkindikterin paı­da­lanady. Sondaı-aq Zerendi demalys aımaǵynda áýesqoı shańǵy sportshylary odaǵy jumys isteıdi. Bul jerde ıt tumsyǵy ótpeıtin qalyń ormannyń qoınaýynda uzyndyǵy 500 metrdi quraı­tyn taý shańǵysynyń joly bar. Tý sonaý taý eteginen atqan oqtaı syrǵanaý esten ketpes lázzat syılaıdy. Shańǵy stadıony dástúrli halyqaralyq Ze­ren­di shańǵy marafonyn ótkizýge múmkin­­dik berýmen qatar, sporttyń osy túri­niń damýyna táp-táýir septigin tıgizip otyr.

Endi bir sát quıqaly, sýly-nýly Qorǵaljyn óńirindegi mol múmkindikti az sózben ajaryn keltirip aıta ketelik. Bul óńirde de qysqy týrızmdi jap-jaqsy damytýǵa mol múmkindik bar. Aıtalyq, kúmis kólderde baýyryn jarqyratyp balyq aýlaýǵa bolady. Aıtpaqshy, mun­daı demalys Býrabaı baýraıyndaǵy shal­qarlar men zerli Zerendide de bar. Jyl saıyn muz ústinde balyq aýlaý festıvalderi uıymdastyrylyp jatady. Qyzyqqa jınalǵan kódedeı qalyń kópshilik tamasha tabıǵattyń mol tartýyn paıdalanýmen qatar, ony kózdiń qarashyǵyndaı qorǵap, keler urpaqtyń sybaǵasy retinde saqtaý kerektigin de kóńilderine túıip ketedi. Bul baǵytta týrızm salasynyń qyzmetkerleri tynymsyz jumys istep jatyr. Alaǵan qoldyń beregen bolǵany da jaqsy ǵoı.

О́ńirde qysqy týrızmdi damytý úshin birqatar ońtaıly is-shara qolǵa alynǵan. Týrıstik qyzmet sýbektileri arasynda ártúrli baıqaýlar ótkiziledi. Jeńimpazdar júldesiz qalmaıdy. Eń bas­ty júlde – halyqtyń yqylasy, qysqy týrızmniń qyzyǵyn kórgen kelý­shilerdiń alǵysy.

– Týrızm qaýymdastyǵy osy kezeń­de demalýshylar arasynda bar jumys­ty ekshep, álemdik tájirıbeniń bizdiń jaǵ­daıǵa keletin ozyq úlgilerin jetildire jumys istep jatyr. Buqaralyq sporttyq is-sharalardy jıi ári qyzyqty ótkizý arqyly qysqy demalys nysandarynyń jyl boıy jumys isteýine járdemdesemiz, – deıdi oblystyq demalys jáne týrızm ındýstrııasy asssosıasııasynyń prezıdenti Shynarbek Batyrhanov.

Kórikti aımaqta qysqy týrızm ýaqyt ótken saıyn damyp keledi. Aldaǵy ýaqytta atyna ajary saı aımaqtyń bar múmkindigi osy baǵytta óristeı bermek.

Aqmola oblysy