Kólik polıseıleri Qostanaı oblysynyń 55 jastaǵy turǵynynan sıntetıkalyq esirtki tárkiledi, dep habarlaıdy Egemen.kz.
Qostanaı stansııasyndaǵy jelilik polısııa bóliminiń qyzmetkerleri jedel-izdestirý is-sharalaryn júrgizý barysynda esirtki zattaryn saqtaǵan Qostanaı oblysynyń 55 jastaǵy turǵynyn anyqtap, ustady.
«Jeke tintý sharalary kezinde ustalǵan azamattan psıhotroptyq zat salynǵan úsh polımerlik túıinshek tabylyp, tárkilendi. Júrgizilgen saraptama qorytyndysy boıynsha tárkilengen zattyń jalpy salmaǵy 2,30 gramm, iri mólsherdegi alfa-PVP sıntetıkalyq esirtki zaty ekendigi anyqtaldy», dep jazylǵan Polisia.kz taratqan habarlamada.
Atalǵan derek QR QK-niń 296-babynyń 4-bóligi (Esirtki, psıhotroptyq zattarmen, sol tektestermen ótkizý maqsatynsyz zańsyz jumys isteý) boıynsha tirkeldi. Qazirgi ýaqytta sotqa deıingi tergep-tekserý jumystary júrgizilip jatyr.