Bul týraly Úkimet basshysy Álıhan Smaıylov áleýmettik jelidegi paraqshasynda málimdedi, dep habarlaıdy Egemen.kz.
«Búginde adamı faktorlarmen qatar, tehnogendik sıpattaǵy oqıǵalarǵa baılanysty qaýipsizdik máselesi men tótenshe jaǵdaılarǵa der kezinde áreket etý aldyńǵy qatarǵa shyǵyp otyr.
Qazir elimizde sý tasqynyna qarsy jumystar qarqyndy júrgizilip jatyr.
Sondaı-aq jaz mezgili de jaqyndap keledi, ıaǵnı órt qaýpi de arta túsedi.
Túrkııa men Sırııada bolǵan joıqyn jer silkinisteri myńdaǵan adamnyń ómirin qıyp, kópshiligi zardap shegip, baspanasyz qaldy. Bul jaǵdaı ár qazaqstandyqtyń qabyrǵasyn qaıystyrdy.
Qaza bolǵandardyń otbasylaryna kóńil aıtamyn, al Túrkııa jáne Sırııa halqyna osynaý qıyn-qystaý kezeńde aýyzbirshilik pen sabyr tileımin.
Sonymen qatar osyndaı qıyn sátte baýyrlas túrik halqyna qol ushyn sozyp, asa qaýipti jaǵdaıda jumys istep júrgen qazaqstandyq qutqarýshylarǵa rızashylyǵymdy bildirgim keledi.
Bul oqıǵalardyń barlyǵy bizdiń ártúrli jaǵdaılarǵa daıyn bolý úshin jedel áreket etý kúshterin ulǵaıtyp, olardy tıisti jabdyqtarmen qamtamasyz etý isine asa kóńil bólýimizdi qajet etip otyr», dep jazdy Premer-mınıstr.
Osyǵan baılanysty QR Úkimeti «Qazaqstan Respýblıkasy Tótenshe jaǵdaılar mınıstrliginiń keıbir máseleleri týraly» qaýly qabyldaǵan. Qujatqa sáıkes, Qazaqstanda TJM-niń jańa áskerı bólimi qurylýda. Ol Aqtóbe qalasynda ornalasady. Jańa bólimniń shtaty – 880 adam.
«Respýblıka boıynsha TJM-niń Shyǵys Qazaqstan, Almaty jáne Qaraǵandy oblystarynda úsh áskerı bólimi bar. Batys aımaqta kólemdi qutqarý qurylymdary joq.
Budan basqa, TJM qyzmetteriniń shtat sany, atap aıtqanda, órt sóndirý bólimsheleri 380 adamǵa, qutqarý stansııalary 220 adamǵa, Apattar medısınasy ortalyǵy 94 adamǵa, «Qazseldenqorǵaý» mekemesi 39 adamǵa kóbeıip jatyr.
Jalpy TJM qatary 1 613 adammen tolyqty.
Osy sharalardyń barlyǵy tótenshe jaǵdaılar boıynsha jedel áreket etý deńgeıin, avarııalyq-qutqarý jumystaryn júrgizýdiń tıimdiligin, eldiń órt qaýipsizdigin, shuǵyl medısınalyq kómek kórsetýdi, sondaı-aq azamattyq qorǵanys áskerı bólimderi men selden qorǵaý qurylystarynyń tolyqqandy jumysyn qamtamasyz etedi.
Úkimet osy baǵyttaǵy jumysyn jalǵastyrady. Biz jedel qyzmetterdi materıaldyq-tehnıkalyq jaraqtandyrý, qutqarýshylardyń eńbekaqysyn kóterý jóninde sharalardy odan ári de qabyldaımyz.
Álemdegi tosyn oqıǵalar adamdardyń qaýipsizdigi bárinen de joǵary ekenin kórsetip otyr», dedi Álıhan Smaılov.