Túrkııada bilim alyp jatqan qazaqstandyq stýdentter Qazaqstan Respýblıkasynyń joǵary oqý oryndarynda oqýyn jalǵastyra alady. Bul týraly Ǵylym jáne joǵary bilim mınıstri Saıasat Nurbek aıtty, dep habarlaıdy Egemen.kz.
«Qazir biz Syrtqy ister mınıstrligimen tyǵyz baılanystamyz. Biz óz azamattarymyzdy, shetelde bilim alyp jatqan jáne qıyn jaǵdaıǵa tap bolǵan qazaqstandyq stýdentterdi, sonyń ishinde Túrkııada bilim alyp jatqandardy qabyldaýǵa daıynbyz», dedi ol búgingi Úkimet otyrysy aıasynda jýrnalısterdiń suraqtaryna jaýap bere otyryp.
Mınıstr túsindirgendeı, qazir JOO-ǵa qabyldaý erejeleri ózgerdi. Eger buryn olardy aýystyrý tek sessııalar arasynda nemese jazǵy demalys kezinde júzege asyrylsa, endi ýnıversıtetter qıyn jaǵdaıda qalǵan stýdentterdi kez kelgen ýaqytta qabyldaýǵa daıyn.
Sońǵy málimetter boıynsha, Túrkııanyń ońtústik-shyǵysynda 6 aqpanda bolǵan jer silkinisi saldarynan 31 643 adam qaıtys bolyp, 80 278 adam túrli jaraqat alǵan. 6 444 ǵımarat qıraǵan. Qutqarý jumystary áli jalǵasyp jatyr.
Aıta keteıik, 6 aqpanda Túrkııanyń ońtústik-shyǵysynda magnıtýdasy 7 balldan asatyn eki joıqyn jer silkinisi boldy (jergilikti ýaqyt boıynsha 04:17-de – 7,7 ball jáne 13:24-te – 7,6 ball).