Álemge áıgili Google kompanııasynda jumys isteý árbir IT-maman úshin úlken mártebe. Degenmen ol bıikti baǵyndyrǵan qazaq balalary jeterlik. Sonyń biri – Taldyqorǵan qalasyndaǵy Nazarbaev Zııatkerlik mektebiniń túlegi Ernııaz Nurǵabylov. Jaqynda jas bilimpaz oqýshylarmen kezdesip, oı bólisti.
Aıadaı ǵana aýyldan shyqqan balanyń bolashaqta álemniń alpaýyt kompanııalarynyń birinde qyzmet etýi buryn oryndalmas armandaı kórinetin. Al qazir bul qoldan keletin is, baǵyndyrýǵa bolatyn beles boldy. Kezdesýde otandasymyz balalarǵa Google-da jumys isteý qoljetpes arman emes ekenin aıtty.
Ernııaz Nazarbayev University-iniń Computer Science fakýltetin bitirgen. Keıin bilimin shyńdaǵan soń, Iаndeks-te taǵylymdamadan ótedi. Artynan Google kompanııasynan shaqyrtý alyp, 2022 jyldyń naýryz aıynan bastap, Polshadaǵy Google keńsesinde baǵdarlamashy-qurastyrýshy retinde jumysqa turady.
– Jumysqa shaqyrtý alǵan soń, kompanııanyń kadrmen qamtý bólimimen baılanys ornatasyz, mundaǵylar qujattardy túgendep, kompanııa jumysymen tanystyrady. Sosyn kelesi kezeńde qyryq bes mınýt boıy onlaın rejimde esep shyǵarýyń kerek. Keıin keńsege shaqyrtylasyz, munda kúni boıy sonda jumys isteıtin bes-alty maman sizge baǵdarlamalaýǵa qatysty ártúrli suraq qoıady. Osy kezeńderden ótkennen keıin arnaıy komıssııa nátıjeni baǵalap, álgi mamandardyń bergen baǵasyn saralap, sońǵy kezeń – kelisimshart jasasýǵa baǵyttaıdy, – deıdi E.Nurǵabylov.
Taldyqorǵan qalasyndaǵy Zııatkerlik mektebinde oqyǵan jyldary Ernııaz matematıka páninen kóptegen halyqaralyq olımpıadany baǵyndyrdy. Tipti, Qazaqstan qurama komandasynyń beldi múshesi de bolǵan. Álemniń onnan astam elinde bilim dodasyna tústi. Eń jarqyn jetistikterdiń biri – halyqaralyq International Mathimatical Olympiad olımpıadasy. Oǵan álemniń túkpir-túkpirinen 150-den astam memlekettiń zııatkerleri qatysady. Talantty Ernııaz bul olımpıadada eki ret, 10-shy jáne 11-synyptarda baq synaǵan. Alǵashqy jarysynda Argentınada kúmis medal alsa, 11-synypta Kolýmbııada qola júldeger atanǵan.
Búginde Google kompanııasy Ernııazdy barlyq jaǵdaımen qamtamasyz etip otyr. Yńǵaıly jumys kestesin, tamasha keńse, tegin tamaq usynady jáne kóshýge kómektesedi. О́zi bolashaqta elge oralyp, Otanymyzdyń áleýetin arttyrýǵa kúsh salǵysy keledi.
– Munda aılyq, eńbek demalysy boıynsha saýdalasýyńa bolady. Elde eńbekaqy aı saıyn beriledi ǵoı, al bul jaqta olaı emes. Tabys túrleri kóp, apta, eki apta saıyn beriletini bar. Sosyn qyzmetkerge kompanııa aksııa usynady. Buǵan qosa jyl saıyn belgili bir kólemde bonýs beredi, – deıdi E.Nurǵabylov.
Mektepti súıispenshilikpen eske alǵan talapty túlek bolashaq mamandarǵa NIS usynatyn barlyq múmkindikti paıdalanýǵa keńes berdi.
Jetisý oblysy