«Astana Opera» balet trýppasynyń jetekshi solısi Baqtııar Adamjan Kıprde ótip jatqan Celebrity ballet gala gala-baletinde tabysty óner kórsetti. Álemniń áıdik juldyzdarynyń oryndaýy asqaq óner merekesiniń sánin keltirse, qazaq bıshisi keshtiń favorıti boldy. Ol kórermenderdi óziniń akterlik sheberligimen, erekshe mánerimen tańǵaldyrdy.
Aıta keteıik, gala-baletke Aǵylshyn ulttyq teatry, «Astana Opera», Úlken teatr, Kreml saraıy, Mıhaılovskıı teatry, Nıderland ulttyq baleti, Berlın memlekettik baleti sekildi álemniń jeti teatrynan 12 prıma-balerına men etýalder qatysty. Konserttiń birinshi kúninde Lımassoldaǵy (Kıpr) «Pattıhıo» teatrynda kórermenderge klassıkalyq jáne zamanaýı baletten úzdik nómirler usynyldy. Bul baǵdarlamany Galanyń kórkemdik jetekshisi, Úlken teatrdyń premeri Igor Svırko jasaǵan. Al 15 aqpanda otandasymyz el astanasyndaǵy Nıkosııa mýnısıpaldyq teatrynda óner kórsetti.
– Celebrity ballet gala uıymdastyrýshylarymen burynnan tanyspyn. Olar meniń ónerimdi baǵalap, osy balet keshiniń qonaǵy bolýǵa shaqyrdy. Munda dúnıe júzinen úzdik bıshiler jınaldy, olardy zamanaýı balet óneriniń qaımaǵy desek bolady. Osynaý keremet mádenı keshke qatysyp, «Astana Opera» teatryn tanystyryp jatqanyma qýanyshtymyn, – dedi Qazaqstannyń eńbek sińirgen qaıratkeri Baqtııar Adamjan.
Kıprlikter onyń oryndaýyndaǵy Senkıngtiń mýzykasyna «In the wake» zamanaýı nómiri men Sezar Pýnıdiń «Esmeralda» baletinen «Dıana jáne Akteon» pa-de-desin jyly qabyldady. «In the wake» nómirin Baqtııar Adamjanǵa osydan birneshe jyl buryn ataqty zamanaýı qytaılyq horeograf Isıan Chjan arnaǵan bolatyn. Al nómirdiń basy men sońyn Baqtııar Adamjan ózi oılap tapqan.
Jalpy, sheteldik sahnalarda jıi óner kórsetetin Baqtııar Adamjan únemi mamandardyń joǵary baǵasyn alyp júr. Tanymal baletmeısterler onyń tehnıkasy mol ekenin, sheberligin birden baıqaıdy. Kóbisin bıshiniń bıik sekirýlerinen birde-bir dybys shyqpaıtyny tańǵaldyrady. Osylaı dybyssyz sekiretin qabileti úshin Baqtııar Adamjan birneshe Úlken teatrda «Mysyq» degen laqap atqa ıe boldy.
«Astana Operanyń» jetekshi solısi qaı shyǵarmany oryndasa da, árdaıym erler bıiniń mádenıetin saqtaıdy. Jyl basynan beri balet juldyzy birqatar halyqaralyq jobaǵa qatysyp úlgerdi. 28 qańtar men 4 aqpan aralyǵynda ol sahnadaǵy juby – «Astana Opera» teatrynyń solısi Shuǵyla Ádephanmen Sıdneı, Brısben jáne Melbýrnde (Aýstralııa) ótken Ballet International Gala álemdik shoýynda óner kórsetti. Balettik jup jasyl qurlyq turǵyndaryn osymen úshinshi ret tańǵaldyryp otyr.
Sondaı-aq Ballet International Gala-daǵy óneri aıasynda Baqtııar Adamjan osy saladaǵy jas ártisterge sheberlik saǵatyn ótkizdi. Áńgime barysynda bıshi tamyzda Aýstralııaǵa tórtinshi ret óner kórsetýge shaqyrý alǵanyn aıtty. Budan bólek ony aldaǵy 1-2 sáýirde Italııanyń Bolonıa qalasynda ótetin «Etýalder» gala-konsertinde kútedi.
– Alda kóp jospar bar. Túrli halyqaralyq jobalarǵa qatysýǵa shaqyrý túsip jatyr. Qazanda Jenevada Iogann Sebastıan Bahtyń mýzykasyna «Jasóspirim jáne ólim» baletiniń premerasy ótedi, ol jaqta da óner kórsetýge usynys aldym. Aıtaıyn degenim, jobalardyń arasynan bedeldisin tańdaýǵa múmkinshilik bar. Olarǵa «Astana Opera» teatrynan áriptesterimdi qatystyrýǵa tyrysyp jatyrmyn, – deıdi ol.
Álemniń ár túkpirinde ótetin spektaklder men gala-konsertterden bólek balet juldyzy teatr repertýaryndaǵy qoıylymdarǵa da qatysady. Baqtııar Adamjan kórermenge naýryzda usynylatyn horeografııa jaýhary – M.Jarrdyń mýzykasyna R.Petıdiń «Parıj Qudaı anasynyń sobory» baletinde sahnaǵa shyǵady.