Frankfýrttaǵy Nemis fýtbol assosıasııasynyń shtab-páterinde fýtbol medısınasynyń damýyna jáne onyń zamanaýı oıyndaǵy sheshýshi róline arnalǵan ÝEFA medısınalyq sımpozıýmy ótti, dep habarlaıdy Egemen.kz QFF-ǵa silteme jasap.
Bul sımpozıýmge ÝEFA-ǵa múshe barlyq qaýymdastyqtardyń, sondaı-aq jetekshi eýropalyq klýbtardyń ulttyq quramalarynyń dárigerleri qatysty.
Spıkerler medısına salasyndaǵy eýropalyq mamandar dalada jáne odan tys jerlerde qıyn jaǵdaılarda jumys isteý jáne sheshim tabý ádisterin qamtıtyn taqyryptarda sóz sóıledi. Olardyń arasynda ÝEFA medısınalyq ofıseri Zoran Bahtııarevıch, Nemis fýtbol assosıasııasynyń medısınalyq komıtetiniń ókili Klaýs Reınsberger, Nıderland koroldik fýtbol assosıasııasynyń bas dárigeri Edvın Godhart, «Barselona» FK áıelder sporttyq densaýlyǵynyń mamany Eva Ferrer, HOK Medısınalyq jáne ǵylymı komıssııasynyń tamaqtaný jónindegi jumys tobynyń tóraǵasy Ron Moen jáne basqalary boldy.
Sımpozıým barysynda negizgi testileý, postkovıdti qalpyna keltirýdiń qıyndyqtary, sondaı-aq áıelder komandalarynyń jattyǵýlarynyń erekshelikteri kóterildi.
«Sımpozıýmǵa qatysýshylar dáristerdiń sapasyna jáne fýtbol medısınasynyń negizgi múddeli taraptarymen qarym-qatynas jasaýdyń biregeı múmkindigine óte rıza boldy. ÝEFA únemi fýtbolshylarǵa joǵary sapaly medısınalyq qyzmet kórsetýge umtylady jáne sımpozıým kezinde týyndaǵan máseleler sheshiledi dep úmittenedi», dep ÝEFA medısınalyq ofıseri Zoran Bahtııarevıch atap ótti.
Bul is-sharada elimizdiń atynan fýtboldan Qazaqstan qurama komandalarynyń dárigerleri Nurlan Bıtuǵylov pen Ahmadhon Iskandarov qatysty.
«Sımpozıýmda kóptegen ózekti taqyryptar talqylandy. Búgingi tańda medısına komandalyq kúsh-jigerdi qajet etedi. Sonymen qatar jyl saıyn fýtbolshylardyń jaraqattar túri ózgergenine baılanysty dıagnostıka da ózgeredi. Mundaı sımpozıýmdar bilimimizdi jetildiredi, onda Eýropanyń kóptegen mamandary tájirıbelerimen bólisedi», dedi Qazaqstan quramasynyń dárigeri Nurlan Bıtuǵylov.