Bıyl qazaqstandyq sharýalar kúnbaǵys, kókónis jáne baqsha daqyldarynyń, sondaı-aq kartoptyń egistik alqaptaryn ulǵaıtýǵa nıetti. Aýyl sharýashylyǵy mınıstri Erbol Qarashókeev Úkimette vedomstvonyń aldaǵy kóktemgi egis naýqanyna arnalǵan josparlary týraly aıtty, dep habarlaıdy Egemen.kz.
Bıyl egis alqaby 23,4 gektardy quraıdy. Bul ótken jylmen salystyrǵanda 68,6 myń gektarǵa artyq. 2023 jyly dándi daqyldar, burshaq jáne jemshóp daqyldary, qant qyzylshasy men kúrish daqyldaryn kóbeıtý josparlanyp otyr. Al maqsary, soıa jáne qysha sııaqty maıly daqyldar az egilýi múmkin. Sondaı-aq maqta alqaptary qysqarady dep boljanyp otyr. Mınıstrdiń aıtýynsha, josparlanǵan egis kólemi ishki naryqtyń qajettilikterin tolyq qamtamasyz etý úshin jetkilikti bolady.
Kóktemgi egis jumystaryn sapaly júrgizý úshin aýyl sharýashylyǵy taýaryn óndirýshiler ońtaıly merzimde qajetti resýrstarmen qamtamasyz etiledi. Qazir arnaıy tehnıka parkinde 470 myńǵa jýyq traktor, sepkish jáne topyraq óńdeý quraldary bar, onyń ishinde bir mezgilde birneshe tehnologııalyq operasııalardy oryndaıtyn 5 myńnan astam zamanaýı egis kesheni bar.
Kóktemgi jumystardy júrgizý úshin óńirlerge 413 myń tonna dızel otyny bólindi, bul ótken jylǵy deńgeıden 13 myń tonnaǵa artyq. Operatorlardyń shyǵystaryn eskere otyryp, fermerler úshin ortasha baǵa lıtrine 204 teńgeni quraıdy, bul naryqtyq baǵadan 15-20%-ǵa tómen. Bıyl aqpan aıynda ońtústik óńirler úshin ǵana emes, astyq egetin soltústik óńirleri úshin de arzandatylǵan JJM jóneltý bastaldy.
Erbol Qarashókeev atap ótkendeı, bıyl shamamen 704 myń tonna tyńaıtqysh engizý josparlanǵan, onyń 63%-y otandyq ónim (ammıak selıtrasy men ammofos). Tyńaıtqyshtardy sýbsıdııalaý baǵdarlamasyna jergilikti bıýdjetterde 31,3 mlrd teńge qarastyrylǵan. Sonymen qatar fermerlerdiń aıtýynsha, ońtústik óńirlerde ammofospen qamtamasyz etýde birqatar másele bolǵan, qazir olar sheshimin taýyp jatyr.
Bıylǵy jyldyń qańtar aıynan bastap alǵash ret 140 mlrd teńge kólemine kóktemgi egis jumystaryn qarjylandyrý máselesi pysyqtaldy. Kórsetilgen qarajattyń bólinýin kútpesten, Agrarlyq nesıe korporasııasy jeltoqsan aıynda qolda bar resýrstar esebinen qarjylandyrýdy bastady. 39,7 mlrd teńge kólemindegi qarjy 1400-ge jýyq aýyl sharýashylyǵy taýaryn óndirýshilerge aýdaryldy. Jalpy 3200-den astam fermerdi qamtý josparlanyp otyr.