Bas prokýratýra qylmysqa qarsy is-qımyl jáne jazanyń bultartpastyǵyn qamtamasyz etý salasynda shet memlekettermen halyqaralyq yntymaqtastyqty belsendi damytyp jatyr, dep habarlaıdy Egemen.kz.
Qazaqstan zańnamasyna sáıkes ekstradısııalaý rásimi izdeýdegi adamdy ustaýdy, oǵan qatysty sottyń sanksııasymen 40 táýlikke ýaqytsha kúzetpen ustaýdy, sodan keıin 12 aı merzimge ekstradısııalyq qamaqqa alýdy qamtıdy. Osy ýaqyt ishinde kúzetpen ustaýdaǵy adamǵa qatysty ekstradısııalyq tekseris júrgiziledi. Budan soń, ony shet memleketke berý múmkindigi týraly sheshim qabyldanady.
Bul rette Bas prokýratýranyń quzyretine izdeýdegi adamdardy ekstradısııalaý týraly sheshimder qabyldaý máseleleri kiredi.
«Atap aıtqanda, 2022 jyly biz shet memleketterdiń ustap berý týraly 90-nan astam suraý salýyn qaradyq. Onyń 80-i qanaǵattandyryldy. Qazaqstannyń negizgi áriptesteri Reseı, О́zbekstan jáne Qyrǵyzstan. Olarmen ekstradısııalaý máseleleri boıynsha ózara is-qımyldyń eń úlken kólemi atap ótiledi. Atalǵan mán-jaılar memleketterdiń quqyqtyq júıeleriniń uqsastyǵyna, olardyń geografııalyq ornalasýynyń jaqyndyǵyna jáne kóshi-qon aǵyndarynyń qarqyndylyǵyna baılanysty», delingen Bas prokýratýra habarlamasynda.
Qylmys sanattary boıynsha adamdar negizinen alaıaqtyq, urlyq, adam óltirý, esirtkiniń zańsyz aınalymy úshin beriledi. Mysaly, Reseı Bas prokýratýrasynyń suraý salýy boıynsha 2022 jyly osy eldiń azamaty A.J. Ýrzagýlov memleketaralyq izdeýde bolǵan jáne Aqtóbe oblysynyń aýmaǵynda ustalǵan. Reseıdiń quqyq qorǵaý organdary N.M. Jýmagazıevti toptyq qylmys jasady dep aıyptady. Orynbor oblystyq sotynyń úkimimen A. J. Ýrzagýlov atalǵan qylmysy úshin 15 jylǵa bas bostandyǵynan aıyryldy. 75 000 AQSh dollary somasyna alaıaqtyq jasaǵany úshin О́zbekstanǵa berilgen G.T. Nábıev Samarqand qalalyq qylmystyq sotynyń úkimimen 9 jylǵa bas bostandyǵynan aıyryldy. Sondaı-aq ótken jyly reseılik quqyq qorǵaý organdaryna Davlatov S.T., Avdeev S. V., Alıev R. H. jáne Tranda E. V. adam óltirgeni úshin; R. S.Hatov, A. A.Sokolov, H. M. Gadamaýrı esirtki satqany úshin berildi. Grýzııa Bas prokýratýrasynyń suraý salýy boıynsha R.M. Chhıkvadze densaýlyqqa aýyr zııan keltirgeni úshin, qyrǵyz tarapynyń suraý salýy boıynsha qaraqshylyq jasaǵany úshin N. K. Qurmanbekov berildi.
«Ekstradısııalaý týraly sharttary joq eldermen adamdardy ustap berý týraly máseleler halyqaralyq quqyqta qoldanylatyn ózara is-qımyl qaǵıdaty negizinde qaralady. Bul rette biz áreketti qylmys retinde ózara taný talabyn basshylyqqa alamyz. Atap aıtqanda, sońǵy jyldary biz AQSh, Túrkııa, Lıtva quzyretti organdarynyń suranysy boıynsha izdeýde júrgen adamdardy berdik. Shet memleketterdiń quqyq qorǵaý organdaryna ekstradısııalaý máselelerinde ýaqtyly jáne sapaly kórsetiletin quqyqtyq kómek bizdiń sheteldik áriptesterimizdiń adamdardy ustap berý týraly qazaqstandyq suraý salýlardy oń qaraýyna kóp jaǵynan yqpal etedi. Jalpy osy baǵytta júrgizilip jatqan jumys jasyryn qylmyskerlerdi áshkereleýge múmkindik beredi», dep jazylǵan habarlamada.