Álemde áıelder sany 3,9 mlrd, bul tıisinshe halyqtyń 49,58%-y. Iаǵnı, er adamdar áıelderge qaraǵanda 65,5 mln-ǵa kóp, dep habarlaıdy Egemen.kz Statisticstimes.com saıtyna silteme jasap
2021 jyly álemde genderlik qatynas 100 áıelge 101,7 er adamdy qurady. 1957 jylǵa deıin áıelder erlerge qaraǵanda kóbirek boldy. Osy jyldar ishinde erler men áıelderdiń araqatynasy ósti: 1950 jyly 100 áıelge shaqqanda 99,7 erkekten 2011 jyly eń kóp degende 101,7 erkekke deıin jetti. 2100 jyly koeffısıent 100,3-ke deıin tómendeıdi dep kútiledi.
Kóptegen elderde erlerge qaraǵanda áıelder kóp. Biraq halqy eń kóp eki el, Qytaı men Úndistanda erlerdiń sany aıtarlyqtaı joǵary. Dál osy elder álemdegi er adam sanynyń kóbeıýine yqpal etedi.
Jasyna qaraı balalar men jastardyń ishinde erlerdiń sany aıtarlyqtaı kóptiginen tepe-teńdiktiń buzylǵany baıqalady. Máselen, 2021 jyly týǵannan 4 jasqa deıingi árbir 100 qyzǵa 106,3 ul, 5 jastan 9 jasqa deıin 106,6, 10 jastan 14 jasqa deıin 106,9, 15 jastan 19 jasqa deıin 107,1 ul baladan keledi. Jastar arasynda jaǵdaı bylaı: 20–24 jas aralyǵyndaǵy 100 qyzǵa shaqqanda 106,7 jigit, 25 pen 29 jas aralyǵyndaǵy 100 qyzǵa — 106,2 jigit.
Neǵurlym eresekter arasynda erlerdiń áıelderge qaraǵanda basymdyǵy 50 jasqa deıin soǵurlym azaıa beredi. 50 jastan bastap áıelder sany erkekterge qaraǵanda basym bola bastaıdy. Máselen, 2021 jyly 50-den 54 jasqa deıingi jas sanatyndaǵy 100 áıelge 99,8 er adam, 60 pen 64 jas aralyǵynda — 95,4 er adam, 70 pen 74 jas aralyǵynda — 86,1 er adam, 80 men 84 jas aralyǵynda — 70,4 er adamnan keledi.
Neǵurlym aıqyn aıyrmashylyq qarttar arasynda baıqalady: 85-ten 89 jasqa deıingi egde jastaǵy adamdar sanatynda 2021 jyly 100 áıelge 60,7 er adam, 90 jastan 94 jasqa deıin — 48,7 er adam, 95 jastan 99 jasqa deıin — 36,7 er adam, 100 jastan joǵary — bar bolǵany 27,8 er adam.