Premer-mınıstrdiń orynbasary – saýda jáne ıntegrasııa mınıstri Serik Jumanǵarın men О́zbekstan Premer-mınıstriniń orynbasary Jamshıd Hodjaev Qazaqstan Prezıdentiniń jeltoqsandaǵy О́zbekstanǵa sapary aıasynda qol qoıylǵan ınvestısııalyq kelisimder men saýda kelisim-sharttaryn iske asyrýdy talqylady, dep habarlaıdy Egemen.kz Úkimettiń baspasóz qyzmetine silteme jasap.
Taraptar birqatar jobanyń oryndalý barysy qanaǵattandyratyny týraly atap ótti. Máselen, Tashkent oblysynda mýltımodaldy logıstıkalyq ortalyqtyń qurylysy boıynsha tehnıkalyq-ekonomıkalyq negizdemeni ázirleýge shart jasaldy. Naýryz aıynyń basynda jobalaý-smetalyq qujattamany ázirleýge shartqa qol qoıý josparlanýda. Jobany iske asyrýdyń 2026 jylǵa deıingi birinshi kezeńi $70 mln kóleminde ınvestısııa tartýdy kózdeıdi.
Taǵy bir perspektıvti birlesken joba – Qazaqstan men О́zbekstan shekarasynda «Ortalyq Azııa» halyqaralyq ónerkásiptik yntymaqtastyq ortalyǵyn qurý. Qańtar aıynyń sońynda taraptar HО́KO-nyń ornalasqan jerin aldyn ala kelisip, nysandy «Atameken» (Qazaqstan) jáne «Gúlstan» (О́zbekstan) halyqaralyq ótkizý beketteriniń aımaǵynda salý boljanyp otyr. Ýaǵdalastyqtardy jaqyn arada bekitý josparlanǵan.
«Investısııalyq kelisimge qol qoıýdy jedeldetetin bolamyz. Jobaǵa eleýli qyzyǵýshylyq kútilýde», dedi Serik Jumanǵarın kooperasııalyq jobalardyń iske asyrylý barysyna monıtorıng júrgizý jáne ımportty almastyrý boıynsha júıeli jumys júrgizý jónindegi jumys tobynyń birinshi otyrysyna qatysýshylarǵa.
Qazaqstan vıse-premeri ózbek seriktesterine Qyrǵyzstanmen shekarada osyndaı saýda-logıstıkalyq hab salý týraly aıtyp, О́zbekstannan kelgen ınvestorlar men kásipkerlerdi osy jobaǵa qatysýǵa shaqyrdy.
О́z kezeginde О́zbekstan Premer-mınıstriniń orynbasary Jamshıd Hodjaev ony birlesip iske asyrýǵa qyzyǵýshylyq bildirdi.
Sondaı-aq kezdesýde taraptar almastyrylatyn ónimdi júıeli jetkizýdi uıymdastyrý úshin birlesken syrtqy saýda kompanııasyn qurý tujyrymdamasyn bekitti. Jumys tobynyń qatysýshylary energetıka, kólik, aýyl sharýashylyǵy, elektrotehnıka ónerkásibi jáne mashına jasaý, ınfraqurylymdyq qurylys, farmasevtıka, hımııa salalary salasyndaǵy kooperasııalyq jáne ınvestısııalyq jobalardyń oryndalýyn qarastyrdy. Iske asyrý barysynda olardyń keıbireýleri ózgerister engizýdi talap etti.
Kooperasııalyq jobalardyń iske asyrylý barysyna monıtorıng júrgizý jáne ımportty almastyrý boıynsha júıeli jumys júrgizý jónindegi qazaq-ózbek jumys tobynyń kelesi otyrysy 2023 jylǵy naýryzda Shymkentte ótedi.