Grekııada jolaýshylar poıyzy men júk poıyzy soqtyǵysty. Oqıǵa saldarynan 26 adam qaza tapty, 85 adam jaraqat aldy, dep habarlaıdy Egemen.kz.
Apat seısenbi kúni keshke Larıssa qalasynyń mańynda boldy. Jolaýshylar poıyzy Afınadan Salonıkaǵa baǵyt alǵan. Al sol jolda oǵan qarsy Salonıkadan Larıssaǵa bara jatqan júk poıyzy bolǵan.
Poıyzdardyń nege bir jolda bolǵany belgisiz. 350 jolaýshysy bar poıyz relsten shyǵyp ketip, vagondar órtenip ketken.
Jergilikti buqaralyq aqparat quraldarynyń habarlaýynsha, eki poıyzdyń dóńgelekteri men basqa da bólikteri on metrdeı jerge ushyp ketken.
«Qaqtyǵys óte kúshti boldy», dedi Fessalııa aımaǵynyń gýbernatory Konstantınos Agorastos.
Onyń aıtýynsha, jolaýshylar poıyzynyń alǵashqy tórt vagony relsten shyǵyp ketken. Al birinshi jáne ekinshi vagondar tolyǵymen órtengen.
Skai telearnasynyń habarlaýynsha, aýyr jaraqat almaǵan jolaýshylar evakýasııalanǵan. Al jaraqat alǵandar jaqyn mańdaǵy aýrýhanalarǵa jetkizilgen.