Qazaqstan Respýblıkasy Syrtqy ister mınıstriniń orynbasary Qanat Týmysh uıymnyń shtab-páterinde Halyqaralyq túrki mádenıeti men murasy qorynyń prezıdenti Gıýnaı Efendıevamen kezdesti, dep habarlaıdy Egemen.kz.
Qonaqty qarsy alǵan Qor prezıdenti Q.Týmyshty Qazaqstanda atalyp ótiletin Alǵys aıtý kúnimen quttyqtady.
Kezdesý barysynda G.Efendıeva qor qyzmeti týraly, túrki halyqtarynyń san ǵasyrlyq tarıhy men baı mádenıetin nasıhattaý maqsatynda álemniń túrli elderinde ótkizilip jatqan jáne josparlanyp otyrǵan sharalar týraly aıtty. Sonymen qatar ol túrki áleminiń kóne murasyn halyqaralyq deńgeıde nasıhattaý baǵytynda birlesken jobalardy júzege asyrýdyń mańyzdylyǵyna toqtaldy.
Halyqaralyq túrki mádenıeti men murasy qorynyń atqarǵan jumysyn joǵary baǵalaı otyryp, Q.Týmysh uıymnyń túrki elderi arasyndaǵy yntymaqtastyqty nyǵaıtýǵa qosqan erekshe úlesin atap ótti. Ol sondaı-aq Qor júzege asyratyn aldaǵy jobalarǵa Qazaqstannyń jan-jaqty qoldaý kórsetetinine senim bildirdi.
Kezdesýde Qordyń qyzmet etken jyldarynda túrki elderimen ǵana emes, álemniń túrli elderimen áriptestik baılanystardyń bolǵany sóz boldy, sondaı-aq basqa da halyqaralyq uıymdarmen yntymaqtastyqtyń mańyzdylyǵy atap ótildi. Taraptar bıyl Qazaqstanda ótýi josparlanǵan Túrki memleketteri uıymynyń X Sammıtiniń túrki elderiniń ıntegrasııasy úshin mańyzy zor ekenin atap ótti.
Sonymen birge bıyl Ázerbaıjannyń uly perzenti Geıdar Álıevtiń 100 jyldyǵy, túrki sopylyq tarmaǵynyń negizin qalaýshy Ahmet Qoja Iаsaýıdiń 930 jyldyǵy, ataqty túrki bıleýshisi Baıbarys Sultannyń 800 jyldyǵy sııaqty ataýly mereıtoılar saltanatty túrde atap ótetini basa aıtyldy.
Sonymen qatar kezdesýde Qazaqstan, uıymǵa múshe elder men baqylaýshylar arasynda mádenıet salasyndaǵy ózara is-qımyldy keńeıtý perspektıvalary talqylandy.