«Baıtaq» jasyldar partııasynyń belsendileri Almatyda jastarmen kezdesti. Basqosýǵa saıası uıym músheleri – belgili zańgerler, dıplomattar men saıasattanýshylar qatysty.
Júzdesý aıasynda partııa baǵdarlamasynyń negizgi baǵyttary túsindirilip, aldaǵy naýqannyń mańyzdylyǵy aıtyldy. Aldyńǵy tolqyn aǵalar qoǵamda ekologııalyq mádenıet qalyptastyrý tóńireginde áńgime órbitip, jastardyń oı-pikirlerin tyńdady. Shaharda úgit-nasıhat jumystary kestege saı júrgizilip jatyr. Partııa belsendileri aldaǵy kúnderi de qarapaıym saılaýshylarmen jáne eńbek ujymdarymen birqatar kezdesý uıymdastyrýdy josparlap otyr. Aıta keteıik, Almaty qalasy boıynsha Májilis depýtattyǵyna partııalyq tizim boıynsha 3 kandıdat tirkelgen. Máslıhat saılaýynda 13 úmitker baq synaıdy.
Partııa saıası keńesiniń múshesi Aınur Sábıtova: «Erkin dıalog formatynda ótken kezdesý nátıjeli boldy. Jastar tarapynan kóp suraq qoıyldy. Olarǵa jan-jaqty jaýap berildi. Aǵa býyn men búgingi jastar arasyndaǵy qarym-qatynas osylaı jalǵasa berýge tıis dep esepteımiz», dedi.
Sondaı-aq «Baıtaq» partııasynyń músheleri Álıhan Bókeıhannyń rýhyna taǵzym etti. Naqtylasaq, «Baıtaq» jasyldar partııasynyń basshylyǵy men saıası qurylym ókilderi «Alash» qozǵalysy kóshbasshylaryna arnalǵan eskertkish mańyna jınalyp, tarıhı tulǵalardyń rýhyna taǵzym jasady.
Elordada ótken is-sharaǵa qaladaǵy qoǵamdyq qorlardyń biri muryndyq boldy. Álıhan Bókeıhan, Ahmet Baıtursynuly jáne Mirjaqyp Dýlatuly syndy ultymyzdyń uly tulǵalaryna arnalǵan eskertkish 2021 jyly jazda ashylǵan bolatyn.
Aıta keteıik, «Baıtaq» partııasynyń respýblıkalyq jáne óńirlik shtabtary kestege saı jumys istep jatyr. Halyqpen kezdesýlerde saılaýaldy baǵdarlamanyń negizgi baǵyttary keńinen túsindirilip, qoıylǵan saýaldarǵa naqty jaýaptar berilip jatyr. «Úgit-nasıhat toby ár aımaqta, ár óńirde halyqpen kezdesý uıymdastyrdy. Osyndaı qyrýar jumys aıasynda biz arnaıy alashtyqtarǵa taǵzym etip kelip otyrmyz. Olarǵa taǵzym etý – tarıhqa taǵzym jasaý», dedi «Baıtaq» jasyldar partııasynyń tóraǵasy Azamathan Ámirtaev.