Senat Tóraǵasy Máýlen Áshimbaev memlekettik organdarda óńirler men ortalyq arasyndaǵy kadrlyq rotasııany qamtamasyz etý kerektigin aıtty, dep habarlaıdy Egemen.kz.
«Qazirgi tańda ortalyq organdardaǵy memlekettik qyzmetshilerdiń kóbinde óńirlerde jumys istegen tájirıbesi joq. Sondyqtan olar aımaqtardaǵy máselelerdi jaqsy biledi dep aıta almaımyz. Jalpy, Úkimettegi, memlekettik organdardaǵy sheshimder óńirlerdiń múddesine negizdelip qabyldanýy kerek. Búgin qarap jatqan zań jobasy osy máseleni oń sheshýge óz septigin tıgizedi dep senemiz», dedi Máýlen Áshimbaev.
Sonymen qatar Palata Spıkeri óńirlerdiń arasyndaǵy rotasııa máselesine de nazar aýdardy.
«Bul rette óńirlerdiń arasyndaǵy kadrlyq rotasııany qamtamasyz etýdiń de mańyzy zor. Mysaly, batystaǵy azamattar shyǵysqa, soltústiktegiler ońtústikke baryp jumys isteıtindeı múmkindikter bolýy qajet. Sondyqtan azamattarymyzdyń ár óńirde jumys isteýine jol ashyp berýimiz kerek. Bul elimizdi birtutas memleket retinde damytýǵa óz úlesin qosatyn mańyzdy qadam ekeni sózsiz», dedi Senat Tóraǵasy.
Aıta keteıik, búgin Senat otyrysynda depýtattar «Qazaqstan Respýblıkasynyń keıbir zańnamalyq aktilerine memlekettik qyzmet máseleleri boıynsha ózgerister men tolyqtyrýlar engizý týraly» zań jobasyn qarady.
Máýlen Áshimbaev zań qabyldanyp, Memleket basshysy qol qoıǵannan keıin onda kórsetilgen normalar qaǵaz júzinde qalmaı, tıisti memlekettik organ rotasııa mehanızmderin dáıekti túrde iske asyrýy kerektigin atap ótti.