El astanasynda hokkeıden Bulbul Kartanbaı atyndaǵy qaıyrymdylyq týrnıri ótti, dep habarlaıdy Egemen.kz elorda ákimdiginiń baspasóz qyzmetine silteme jasap.
Is-shara Halyqaralyq áıelder kúnine oraı uıymdastyryldy. Oǵan áıelder hokkeı akademııasynyń 6 komandasy qatysty.
Astana qalasy dene shynyqtyrý jáne sport basqarmasy basshysynyń orynbasary Erkeǵalı Korbozov atap ótkendeı, týrnırdiń maqsaty – jazataıym oqıǵa kezinde zardap shekken elordalyq sport mektebiniń tárbıelenýshisine qoldaý kórsetý.
«Týrnır únemi ótkizilip turady. Sol sebepti bıyl demeýshilerdi izdeýge úlken múmkindik týdy. Túsken qarajattyń bári Dıas Marattyń kómegine jumsalady. Jas hokkeıshi birneshe jyl buryn jaraqat alǵan, áli kúnge deıin aýyr jaǵdaıda jatyr», dedi Erkeǵalı Korbozov.
Alaıda is-sharanyń negizgi kún tártibi Halyqaralyq áıelder kúni boldy, sondyqtan týrnırdiń barlyq qatysýshysyna syılyq retinde jabdyqtar men ózge de sporttyq aksessýarlar tapsyryldy.
Aıta ketý kerek, Bulbul Kartanbaı – elimizdegi alǵashqy áıelder hokkeı akademııasynyń negizin qalaǵan. Ol sondaı-aq ulttyq áıelder hokkeı lıgasynyń alǵashqy Qazaqstandyq oıynshysy bolyp sanalady.