Qazaqstan halyq partııasynyń tóraǵasy Ermuhamed Ertisbaev barsha qazaqstandyqtardy aldaǵy saılaýǵa belsendi qatysýǵa shaqyrdy, dep habarlaıdy Egemen.kz.
«Bizdiń partııamyzdyń ıdeıasy – sosıalızm. «Qaıdaǵy sosıalızm?» dep suraýlaryńyz múmkin. Mysaly, skandınavııalyq sosıalızm bar. Norvegııa osydan jarty ǵasyr buryn ǵana Soltústik teńizden munaı men gazdyń orasan zor qoryn tapqan. Al qazir árbir norvegııalyqtyń arnaıy shotynda orta eseppen 238 myń eýro jatyr. Jańadan velosıped oılap tabýdyń qajeti joq. Bizde ıdeıa bar, sol ıdeıaǵa qadam basyp kelemiz. Bul turǵydan alǵanda, eger 19 naýryzda mıllıondaǵan adam Halyq partııasynyń baǵdarlamasyn qoldasa, bul ıdeıa materıaldyq kúshke aınalady. Biz bul iske izgi nıetpen qaraımyz», dedi Ermuhamed Ertisbaev KTK telearnasynda ótken jatqan televızııalyq pikirsaıysta.
Sondaı-aq ol pikirsaıysqa qatysýshylardy eldiń orta jáne uzaqmerzimdi damý keleshegi týraly paıymyn pash etýge úndedi.
«Túsinesizder me, biz qazir sıfrlar men faktilerge, alýan túrli ýádelerge erip ketýimiz múmkin. Al pikirsaıys degen - pikir almasyp, ıdeıa bólisetin alań», dedi E. Ertisbaev.
Onyń aıtýynsha, halyq naqty ózgeristerdi qalaıdy.
«19 naýryzda kimge daýys berseńizder de, ózińiz bilesiz. Tek azamattyq, konstıtýsııalyq paryzyńyzdy oryndasańyz boldy, eń bastysy – saılaýǵa kelińizder!», dedi partııa tóraǵasy.