Elge iritki salyp, qoǵamdyq tártipti buzýǵa úgittegen adamdar qatań jazalanady. Bul týraly Memleket basshysy Premer-mınıstrdiń, memlekettik organdar basshylarynyń, oblystar men Astana, Almaty, Shymkent qalalary ákimderiniń qatysýymen ótkizgen keńesinde aıtty, dep habarlaıdy Egemen.kz.
«Bizdiń naqty josparymyz bar, baǵyt-baǵdarymyz aıqyn. Eń aldymen, halyqtyń turmys sapasyn jaqsartýǵa basa mán berýimiz kerek. Memleket buǵan bar kúsh-jigerin jumyldyrýǵa tıis. Jalpy, kúndelikti atqarylatyn jumys az emes. Kóktem kelgende jer jyrtý, egin egý sııaqty túrli naýqan bastalady. Qaýipsizdik, densaýlyq saqtaý, bilim berý, qarjy salasyndaǵy turaqtylyq, munyń bári – ózekti másele. Basqa da mańyzdy sharýalar bar», dedi el Prezıdenti.
Memleket basshysynyń aıtýynsha, azamattarymyz elde oń ózgeris bolyp jatqanyn únemi sezinýi qajet. Ol úshin ıgi bastamalardyń mán-mańyzyn halyqqa udaıy aıtyp otyrǵan jón. Turaqsyzdyqqa aparatyn áreketterge jol bermeýimiz tıis.
«Mundaı zańsyz áreketterdiń aldyn alý qajet. Elge iritki salyp, qoǵamdyq tártipti buzýǵa shaqyrǵan adamdar qatań jazalanady. Arandatýǵa qarsy kúres zań aıasynda, jedel ári júıeli túrde júrgizilýi kerek», dep atap ótti Q.Toqaev.
Sonymen qatar Prezıdent tıisti zańdar qatań saqtalýy kerek ekendigin de aıtty. Áıtpese áreketsizdiktiń saldary elimiz úshin óte qaýipti bolýy múmkin. Bizge, eń aldymen, zań ústemdigi asa qajet. Zań saqtalsa jáne azamattyq jaýapkershilik joǵary bolsa, qoǵamda tártip bolatynyn qosa aıtty.