Mahambet aýdanynda Aqjaıyq atalatyn aýyldyq okrýg bar. Jaıyq ózeniniń jaǵasyndaǵy aýyl turǵyndary negizinen tórt túlik ósirip, egin egedi. Byltyr munda jylyjaı kesheniniń qurylysy bastalǵan edi.
Jańa jylyjaıdyń aýmaǵy – 4 gektar. «Jumaǵalıeva N.M» sharýa qojalyǵy iske asyrǵan jobanyń jalpy quny 3 mlrd teńgeden astam qarjyny quraıdy. Jaqynda úsh bloktan turatyn jylyjaı kesheniniń birinshi kezeńi iske qosyldy. Jylyjaıdan jylyna 1 600 tonna ónim jınalady.
«Atyraý oblysynda buryn-sońdy bolmaǵan jylyjaı kesheni ashyldy. Bul joba Memleket basshysy Qasym-Jomart Toqaevtyń shaǵyn jáne orta bıznesti qoldaý týraly tapsyrmasy aıasynda qolǵa alynǵan edi. Eń basty maqsat – azyq-túlik qaýipsizdigin qamtamasyz etý», deıdi oblys ákimi Serik Shápkenov.
Sharýa qojalyǵy jetekshisiniń aıtýynsha, jylyjaı kesheninde 60-tan astam adam jumys isteıdi. Onyń 40-tan astamy – jergilikti turǵyndar. Olar jylyjaıdan jylyna 900 tonna qyzanaq, 700 tonna qııar jınaýdy kózdep otyr. О́nimniń ekeýi de gollandııalyq sorttan ósiriledi. Máselen, qyzanaqtyń «Merlice» dep atalatyn túri táýligine 6 tonna, qııardyń «Golden» sorty táýligine 7 tonna ónim beredi eken. Toǵyz aıda ár óskinnen táýligine 18 kılo ónim alýǵa bolady.
Jyl boıy kókónis ósiriletin jylyjaı kesheniniń jumysy tolyq avtomattandyrylǵan. Munda tamshylatyp sýarý ádisi qoldanylady. Tipti atalǵan ádis arqyly tyńaıtqysh eritindi túrinde beriledi. Endi sharýa qojalyǵynyń jetekshisi jylyjaı kesheniniń aýmaǵyn 16 gektarǵa ulǵaıtyp, úı janýarlaryn, qus pen balyq túrlerin ósirýdi josparlap otyr.
Atyraý oblysy