Naýryzdyń 15-indegi málimet boıynsha Batys Qazaqstan oblysynda 54 turǵyn úı men 10 saıajaı úıin sý basqany habarlandy. Sýǵa ketken úıdiń bári de Bórli aýdanynda.
Batys Qazaqstan oblystyq tótenshe jaǵdaılar departamentiniń habarlaýynsha, Bórli aýdanynyń Aqbulaq aýylynda – 14, Qyzyltalda – 16, Keńtúbek aýylynda – 15, Aqsýda – 3, Baqtyaralda – 5 úı, Aqsaı qalasynyń ózinde 1 úı sý ishinde tur. Budan buryn sý basqan Syrym aýdanyndaǵy 5 úıden, Terekti aýdanyndaǵy 1 úıden sý sorylyp shyǵarylǵan.
Qutqarýshylardyń jáne jergilikti ákimdik qyzmetkerleriniń uıymdastyrýymen 265 adam qaýipsiz jerge kóshirildi. Munyń 168-i – Bórli aýdanynan bolsa, 26 adam Syrym aýdanynan, 65 adam Qaratóbe aýdanynyń Qorjyn aýylynan. Aıta keteıik, Syrym aýdanynda qazir qaýip seıilip, 20 adam Jympıtyǵa, 6 adam О́leńti aýylyna, óz úıine oraldy.
Adamdarmen birge qaýipti aýmaqtan 282 bas mal da shyǵarylǵanyn jazǵan edik. Ázirge 6 bas qoı-eshki ólgeni belgili boldy.
О́zennen lyqsyp shyqqan muz Syrym aýdanynda elektr baǵanalaryn qıratyp ketken bolatyn. Ázirge Jambyl aýylynda 48 abonent jaryqsyz otyr. Oqıǵa ornyna jóndeýshiler jol qıyndyǵyna baılanysty jete almaı otyr.
«Jympıty-Qaratóbe» baǵytyndaǵy oblystyq mańyzy bar avtojoldyń bir bóligi tasqyn sý kesirinen buzylyp, qazir Qaratóbe aýdanyna qarasty Alakól, Aqtaı, Qoskól, Aqqozy, Qorjyn, Besoba, Qosbaz, Sáýle, Qaraqamys eldi mekenderine qatynas úzilip qaldy. Oqıǵa ornynda jergilikti bıliktiń kúshimen birneshe ekskavator, tıegish traktor joldy qalpyna keltirýge kiristi.
Sońǵy bir táýlik ishinde oblystyq jáne aýdandyq mańyzy bar 6 jol bóliginen qarǵyn sý asyp túskeni týraly habar kelip otyr. Olar Bórli, Syrym, Terekti aýdandary aýmaǵynda.
Odan bólek, 11 jerde jol jabyndysy búlinip, qarym-qatynas ýaqytsha toqtatylǵan. Joǵaryda aıtylǵan qaratóbelik 9 aýyldan bólek, Shyńǵyrlaý aýdanynyń Almaz, Aqtaý, Segizsaı aýyldarymen kólik qatynasy toqtady.
Tótenshelikterdiń habarlaýynsha, sońǵy bir táýlik ishinde 996 adam qutqarý, tabıǵı apattyń betin qaıtarý isine atsalysqan. Olardyń ishinde qutqarý qyzmetinen bólek ishki ister qyzmetkerleri, Ulttyq ulan jaýyngerleri, jergilikti turǵyndar, eriktiler de bar. Aıta keteıik, «Qazavıaqutqarý» mekemesiniń tikushaǵy da 5 adamdyq ekıpajymen qutqarý jumystaryna atsalysýda.
Sońǵy bir táýliktiń ishinde ǵana 3750 dana qapshyq qum qaýipti jerlerge tóselgen.
Buǵan deıin Oral qalasynda, Shyńǵyrlaý, Bórli jáne Báıterek aýdandarynda jergilikti masshtabtaǵy tabıǵı sıpattaǵy tótenshe jaǵdaı jarııalansa, buǵan endi Qaratóbe men Qaztalov aýdandary qosyldy.
О́ńirdegi tabıǵı apattyń betin qaıtarýǵa kómektesý úshin Atyraý men Mańǵystaýdan kómek kelgenin aıtqan edik. Atyraý oblystyq TJD-niń 49 mamany eki topqa bólinip, Qaratóbe men Bórli aýdandaryna attansa, mańǵystaýlyq 62 qutqarýshy Oral qalasyna jáne Qaztalov aýdanynyń Jalpaqtal aýylyna bekitilgen.
Apatqa qarsy qurylǵan oblystyq jedel shtab múshelerinen qurylǵan bir top Derkól men Shaǵan ózenderiniń ahýalyn áýeden baıqap qaraý úshin tikushaqpen barlaý jasap qaıtty.
О́kinishke qaraı, qaraly habar da bar: Shyńǵyrlaý aýdanynyń Aqtaý eldi mekeninen 11 naýryz kúni keshkisin 39 jáne 46 jastaǵy eki er adam traktormen Aqsaı qalasyna qaraı shyqqan eken. Sol kúıi habarsyz joǵalǵan. Oqys oqıǵa týraly habar tıisti oryndarǵa tek 14 naýryz kúni keshkisin, 17.17. saǵatta túsken. Qarashyǵanaq Petroleým Opereıtıng b.v. kompanııasynyń jol talǵamaıtyn kóligimen 5 adam – arasynda aýdandyq aýrýhana dárigeri bar qutqarýshylar túngi saǵat 23:25-te jolǵa shyqqan. Alaıda qarańǵy tún, aınala sý, laısańnan jol tappaı, túngi saǵat 3:00-de izdeý jumysyn toqtatýǵa májbúr bolǵan. Naýryzdyń 15-inde Batys Qazaqstan oblystyq polısııa departamenti 1984 jyly týǵan er adamnyń máıiti tabylǵanyn rastady. Joǵalǵan ekinshi adam aman-saý. Aldyn ala habarlarǵa qaraǵanda, traktor buzylyp, eki er adam malshy qystaǵyna jaıaý barmaq bolǵan. Alaıda bireýi jete almaǵan.
О́tken táýlikte Shiderti, Derkól, Shejin, Kópirli Ańqaty, О́leńti, Shyńǵyrlaý jáne Saryózende sý deńgeıi tómen túse bastaǵany baıqalǵan.
Alaıda Jaıyq ózeninde, Kóshim men Shaǵanda, Qaztalov aýdanyndaǵy Qaraózende, Báıterek aýdany aýmaǵyndaǵy shaǵyn Rýbejka, Bykovka ózenderinde sý kóterilip jatyr. Oblystyq jedel shtab, barlyq aýdanda uıymdastyrylǵan 13 shtab jaǵdaıdy tolyq baqylaýǵa alyp otyr.