QR Tótenshe jaǵdaılar mınıstrligi ata-analardy balalar qaýipsizdigine erekshe nazar aýdarýdy suraıdy, dep habarlaıdy Egemen.kz vedomstvonyń baspasóz qyzmetine silteme jasap.
19 naýryz kúni saǵat 18:15-te Qaraǵandy oblysynyń Balqash qalasyndaǵy Muhamedjanov shaǵyn aýdanynda eki jasar bala 5-qabatta ornalasqan páterdiń terezesinen qulap ketken. Oqıǵa kezinde balanyń anasy basqa bólmede bolǵan. Aýyr jaraqat alǵan bala Balqash qalasyndaǵy ortalyq aýrýhanaǵa jetkizildi. Sol jaq jambasynda ashyq synyǵy bar. Dárigerlerdiń aıtýynsha, balanyń jaǵdaıy aýyr.
Shymkentte kóppáterli turǵyn úılerdiń biriniń terezesinen bes jasar qyz qulap tústi. Jazataıym oqıǵa týraly aqparat 23 naýryzda saǵat 14:50-de «103» qyzmetinen Shymkent qalasy, TJ departamentiniń Daǵdarys jaǵdaılarda basqarý basqarmasyna tústi. Oqıǵa Shymkent qalasy, Ál-Farabı aýdany, 16 shaǵyn aýdanyndaǵy kópqabatty № 18 turǵyn úıde bolǵan. Kóppáterli 5-qabatty turǵyn úıdiń 4-qabatynda ornalasqan páterdiń terezesinen ata-anasynyń qaraýynsyz qalyp, 2018 jyly týǵan qyz terezeden qulap qalǵan. Ol tez arada aýyr jaǵdaıda aýrýhanaǵa jetkizildi.
Oqıǵanyń mán-jaıyn Shymkent qalasy Polısııa departamentiniń qyzmetkerleri anyqtap jatyr. Dárigerler qyzǵa ota jasady.
Sondaı-aq 21 naýryzda Astana qalasynda turǵyn úıdiń terezesinen balanyń qulap túskeni týraly habarlama kelip tústi.
21 naýryz kúni saǵat 18:55-te Áýezov kóshesinde bes qabatty turǵyn úıdiń tórtinshi qabatynan eresekterdiń qaraýynsyz qalǵan 2014 jyly týǵan qyz terezeden qulap tústi. Qyz bala aýrýhanaǵa jatqyzyldy, jaǵdaıy ortasha.
«Joǵaryda atalǵan jaǵdaılardyń barlyǵy eresekterdiń, ata-analardyń salǵyrt qaraýynyń, balalardyń júris-turysyn baqylamaýynyń, terezelerde blokatorlardyń bolmaýynyń, jıhazdy durys ornalastyrmaýdyń saldarynan boldy. Úıdegi jıhazdy durys ornalastyrmaý balalarǵa terezelerge óz betinshe kóterilýine múmkindik beredi», dep jazady TJM baspasóz qyzmeti.
Osyǵan baılanysty TJM balalardyń terezeler men balkondardan qulaýyna jol bermeý úshin kelesi qaýipsizdik sharalaryn saqtaýdy suraıdy
- kishkentaı balalardy qaraýsyz qaldyrmańyz;
- kishkentaı bala terezeniń aldyna shyǵa almaý úshin jıhazdyń barlyq túrlerin terezeniń janynan alyp tastańyz;
- moskıt toryna senbeńiz. Olar qulaýdan qorǵaýǵa arnalmaǵan;
- balaǵa terezeni birneshe santımetrden artyq ashýǵa múmkindik bermeıtin arnaıy bekitkishterdi qoıyńyz;
- ashyq terezeniń janynda bolý qaýpi týraly balalarǵa túsindirińiz;
- eger bekitkish qurylǵy ornatý múmkindigi bolmasa, terezeniń tutqasyn alyp tastap, ony tek qajet bolǵan jaǵdaıda ornatyńyz.