Bıyl alǵash ret 45 aýdan jáne oblystyq mańyzy bar qala ákimderin tikeleı saılaý ótedi. Bul týraly Prezıdent VIII saılanǵan Parlamenttiń alǵashqy sessııasynda aıtty, dep habarlaıdy Egemen.kz.
«Nebári bir jylda mundaı aýqymdy jumysty iske asyrý – naǵyz jasampaz jurttyń ǵana qolynan keletin sharýa. Biz Otanymyzdy órkendetý jolynda zor betburys jasap, jańa dáýirge qadam bastyq. Biraq ózgerister munymen bitpeıdi. Bul – uzaq joldyń basy ǵana. Reformalar jalǵasa beredi, saıası qurylymdy jetildirý qajet. Bul – asa mańyzdy jumys», dedi Prezıdent.
Bıyl alǵash ret 45 aýdan jáne oblystyq mańyzy bar qala ákimderin tikeleı saılaý ótedi. Sodan keıin elimizdegi barlyq aýdan ákimderi saılanady. Osylaısha, bıliktiń barlyq ınstıtýttary jańaryp, tyń qarqynmen jumys isteı bastaıdy.
«Biz saıası úderisti demokratııalandyryp, azamattardyń memleketti basqarý isine qatysý múmkindigin keńeıte beremiz», dep atap ótti Q.Toqaev.
Prezıdenttiń aıtýynsha, Qazaqstan – osy geosaıası aımaqta túbegeıli reforma júrgizip jatqan birden-bir el. Keıbir adamdar, solardyń ishinde saıasatkerler de bar, osyndaı reformalar Qazaqstanǵa qaýip tóndirýi múmkin dep aıtady. Biraq bul ózgeristerdiń barlyǵy, eń aldymen, el bolashaǵy úshin aýadaı qajet.
«Alǵan betimizden qaıtýǵa bolmaıdy. Kerisinshe, zań ústemdigi, halyq birligi, áleýmettik ádildik jáne ishki saıası turaqtylyq sekildi irgeli qundylyqtarǵa basa mán bere otyryp, reformalar jolymen alǵa qaraı nyq qadam basýymyz kerek», dedi Memleket basshysy.