Bul týraly Prezıdent VIII saılanǵan Qazaqstan Respýblıkasy Parlamentiniń birinshi sessııasynda aıtty, dep habarlaıdy Egemen.kz.
«Qysqasy, depýtattarǵa bir ǵana mańyzdy mindet júkteledi. Iаǵnı, árdaıym ózgeristerdiń bel ortasynda bolý kerek. Sizder sheshim qabyldaısyzdar jáne sol úshin jurt aldynda jaýap beresizder. Halyqtyń múddesin tıimdi qorǵaý jáne elimizdegi ózekti máselelerdi sheshýge atsalysý úshin azamattarmen tyǵyz qarym-qatynas ornatý qajet.
Elimizdiń negizgi basymdyqtaryn barshańyz jaqsy bilesizder. Bul – turǵyndardyń ál-aýqatyn arttyrý jáne ulttyń jańa sapasyn qalyptastyrý. Sol arqyly tamyry tereńde jatqan memlekettilik dástúrimizdi nyǵaıta túsý. Osy oraıda, men Parlamenttiń aldaǵy jumysy týraly oıymdy ortaǵa salǵym keledi», dedi Memleket basshysy.
Prezıdenttiń aıtýynsha, birinshiden iskerlik belsendilikti yntalandyrý qajet. Ol úshin, eń aldymen, ádil, turaqty ári ashyq salyq júıesin qalyptastyrý kerek.
Salyq saıasatynyń jańa modeli ulttyq baılyqty tıimdi bólýdi, ekonomıkalyq belsendiliktiń joǵary deńgeıi men ekonomıkanyń basym baǵyttaryn naqty qoldaýdy qamtamasyz etýge tıis. Salyq kodeksi jáne tutas salyq saıasaty túsinikti, turaqty bolýy qajet.
Fıskaldyq organdardyń bıznespen qarym-qatynasyna qatysty búkil prosesti tolyq sıfrlandyrý kerek. Bul kásipkerlerdiń tirshiligin aıtarlyqtaı dárejede jeńildetýge jáne bıýdjet kirisin júıeli túrde ulǵaıtýǵa septigin tıgizedi.
Sonymen qatar Parlamentte memlekettik bıýdjetke mol kiris ákeletin korporatıvtik tabys salyǵy men qosymsha qun salyǵyna qatysty mólsherlemelerdi ártaraptandyrý múmkindigi talqyǵa salynady.
«Iri kásiporyndar jáne shıkizat eksportymen aınalysatyn kompanııalar qazynaǵa kóbirek tólem túsirse, ádildik bolar edi. Bul álemde bar ozyq tájirıbe. Qazir eldegi jaǵdaı túbegeıli ózgerdi. Ádiletti Qazaqstan degenimiz – jalań uran emes, bul – anyq aqıqat. Alda atqaratyn jumys kóp. Biz buǵan bir el bolyp túgel atsalysýymyz kerek», dedi Q.Toqaev.