Májilistiń jalpy otyrysy barysynda palata tóraǵasynyń eki orynbasary saılandy, dep habarlaıdy Egemen.kz.
- «QR Parlamenti jáne onyń depýtattarynyń mártebesi týraly» Konstıtýsııalyq zańy 9-baby 8-tarmaǵyna sáıkes, palata depýtattary arasynan Májilis tóraǵasynyń usynýymen palata depýtattary jalpy sanynyń kópshilik daýysymen saılanatyn eki orynbasary bolady. Sondyqtan ózime berilgen quqyqty paıdalana otyryp, Parlament Májilisi tóraǵasynyń orynbasary laýazymyna aldymen Májilis depýtaty Albert Raýdyń kandıdatýrasyn usynamyn, - dedi Májilis tóraǵasy Erlan Qoshanov palatanyń jalpy otyrysynda.
Daýys berý barysynda otyrysqa qatysqan 97 depýtattyń 96-sy Albert Raýdyń kandıdatýrasyn qoldap, 1 depýtat qalys qaldy.
Osydan keıin Májilis tóraǵasy 2-shi orynbasary laýazymyna Danııa Espaevanyń kandıdatýrasyn usyndy.
«Danııa Mádıqyzy - tájirıbeli ekonomıst. Kóptegen jyldar boıy basshylyq qyzmette, bank sektorynda jumys istegen. 7-saılanymdaǵy Qarjy jáne bıýdjet komıtetiniń hatshysy bolyp, zań shyǵarý qyzmetine belsene atsalysty. О́zin kásibı maman retinde kórsete bildi», dedi Erlan Qoshanov.
Danııa Espaevanyń kandıdatýrasyn 94 depýtat qoldady, bir depýtat daýys bergen joq, 2 depýtat qalys qaldy.