Bul joba ótken jyly bastalǵan. Almaty stomatologııalyq kolledjiniń dırektory Sátbaev Ýnıversıtetine jumys saparymen baryp, jas ǵalymdarmen kezdesken. Jıynda stomatologııa salasynyń qıynshylyqtary talqylanǵan edi.
«Bul kezdesý áli esimde. Sol kezde biz tis protezin ornatý kezinde qyzyl ıektiń aýyrsyný prosesin talqyladyq. Buryn tistiń aýyrsynýyn dáriger óz qolymen anyqtaıtyn. Biraq ár adamnyń aýrýy ártúrli ǵoı. Jasandy tis saldyrǵan adamdardyń jaq súıekteri qatty aýyryp, dárigerge qaıtadan keledi eken. Sondyqtan tis mamandaryna naýqastyń qyzyl ıeginiń sezimtaldyǵyn, onyń aýyrsynýyn anyqtaıtyn qural qajet boldy. Osyny estigennen keıin men birden mundaı qurylǵyny qalaı jasaý kerektigi týraly oılanyp, shabyttana tústim», deıdi Aqjol.
Aqjoldyń negizgi mamandyǵy – elektrondy medısınalyq qurylǵylardy qurastyrý. Joba «Qyzyl ıek sezimtaldyǵyn ólsheıtin qurylǵy» dep ataldy. Qurylǵynyń jumysy dene qyzýyn ólsheýge arnalǵan qurylǵylarǵa uqsas bolyp keledi. Degenmen, bul qurylǵy sezimtaldyq deńgeıin ólshep, tis dárigerine naýqastyń qanshalyqty aýyratyny týraly naqty aqparat beredi.
Jobamen aınalysatyn ǵalymdar toby naryqty zerttep, ári shetelde jasalǵan qurylǵylardy salystyryp, bizdiń elde de osyndaı ónim óndirýdi uıymdastyrý maqsatymen jumys istedi. Degenmen, qajetti qurylǵy naryqtan tabylmaı, komanda qurylǵyny jańadan qurastyryp jasady. Osylaısha, álemde teńdesi joq qural paıda boldy.
Qazirgi ýaqytta jas ǵalymdar óz ónertabystaryn synaqtan ótkizip, jan-jaqty jetildirip jatyr. Aqjol Nurdanáliniń oılap tapqan ónertabysynyń sátti shyǵýy tek Almatyda ǵana emes, tutas Qazaqstannyń stomatologııa salasyndaǵy jańalyq bolmaq.