Elimizdegi joǵary oqý oryndarynda bilim alýǵa arnalǵan stıpendııalyq baǵdarlamaǵa qujat qabyldaý bastaldy, dep habarlaıdy Egemen.kz.
Baǵdarlamaǵa shetel azamattary, onyń ishinde Qazaqstan Respýblıkasynyń azamatyǵy joq qazaq ultynyń ókilderi qatysa alady. О́tinish berý onlaın formatta QR ǴJBM Joǵary bilimdi damytýdyń ulttyq ortalyǵynyń https://enic-kazakhstan.edu.kz/ veb-portaly (veb-saıty) arqyly júzege asyrylady.
Joǵary bilim berýdi ınternasıonaldandyrý maqsatynda bakalavrıat, magıstratýra jáne doktorantýranyń bilim berý baǵdarlamalary boıynsha Qazaqstannyń joǵary oqý oryndarynda shetel azamattaryn oqytý úshin 550 grant, onyń ishinde bakalavrıatqa 490 grant, magıstratýraǵa 50 grant, PhD doktorantýraǵa 10 grant bólingen. Baǵdarlama aıasynda tegin bilim berý men bilim alýshynyń akademııalyq jetistikterine baılanysty aı saıynǵy stıpendııamen qamtamasyz etiledi.
QR ǴJBM Joǵary bilimdi damytýdyń ulttyq ortalyǵynyń saıtynda qujattardy onlaın qabyldaý 30 naýryzda bastalyp, 30 maýsymǵa deıin jalǵasady.
Úmitkerlerdi irikteý usynylǵan qujattar, beıimdelý áleýetin anyqtaýǵa arnalǵan onlaın-testileý nátıjeleri jáne onlaın áńgimelesý negizinde júrgiziledi. Stıpendıattar tizimi bıylǵy jyldyń 28 tamyzyna deıin jarııalanady.