ASTANA. 2 shilde. Búgin tań aldynda Salvador qalasynda Belgııa men AQSh quramalary arasyndaǵy 1/8 fınaldyq oıyn aıaqtaldy. Onyń negizgi ýaqyty 0:0 esebimen teń bitti. Al overtaımda belgııalyqtar 2:1 esebimen jeńiske jetti. Bul týraly egemen.kz habarlady.
Match bastan-aıaq keskilesken tires ústinde ótti. Onyń óne boıynda belgııalyqtar aıtarlyqtaı basymdyq tanytty. Bul kóptegen múmkindikterdiń júzege asyrylmaǵan matchy boldy. Olardyń denin eýropalyqtar jasady.
Belgııa – AQSh 2:1. Negizgi ýaqyt – 0:0. Overtaım – 2:1.
2 shilde. 2 ııýlıa. Salvador. «Fonte-Nova» stadıony. Tóreshi - Djamel Haımýdı (Aljır).
Belgııa: Tıbo Kýrtýa, Tobı Aldverveıreld, Vensan Kompanı, Iаn Vertongen, Aksel Vıtsel, Kevın de Brıýıne, Marýan Fellaını, Danıel Van Bıýıten, Eden Azar (Naser Shadlı, 112), Drıs Mertens (Kevın Mıralıas, 61), Dıvok Orıgı (Romelý Lýkaký, 91).
AQSh: Tım Hovard, Omar Gonsales, Maıkl Bredlı, Mett Besler, Damarkýs Bızlı, Klınt Dempsı, Alehandro Bedoııa (Djýlıan Grın, 107), Djermeın Djons, Grem Zýsı (Krıs Vondolovskıı, 73), Djeff Kemeron, Fabıan Djonson (DeAndre Iedlın, 32).
Gol: Kevın de Brıýıne (93), Romelý Lýkaký (105), Djýlıan Grın (107).
Eskertýler: Vensan Kompanı (42) - Djeff Kemeron (18),
Brazılııa alańdarynda eń sońǵy shırek fınalǵa qatysýshyny anyqtaýǵa arnalǵan bul match salǵannan qyzyqty bastaldy. Oıynnyń 1-mınýtynda AQSh quramasy qaqpasy aldynda qaýipti sát týdy. «Qyzyl fýrııa» shabýylshysy Dıvok Orıgı qorǵaýshynyń janynan jalt berip ótip, aıyp alańynyń ishinde birinshi soqqyny jasady. Qıys buryshtan urylǵan bul dopty qaqpashy Tım Hovard aýtqa jiberip, alǵashqy buryshtama soqqysynyń berilýine jol ashty. Belgııalyqtar budan keıin de oıyn tizginin óz ýysynan shyǵara qoıǵan joq.
AQSh fýtbolshylary ózderiniń birinshi qaýyrt shabýyldaryn 21-mınýtta jasady. Onyń aqyry Klınt Dempsıdiń qaqpaǵa soqqy jasaýymen aıaqtaldy. Onyń urǵan dobyn qaqpashy Tıbo Kýrtýa qulap jatyp qaǵyp aldy.
Al arada eki mınýt ótkende AQSh fýtbolshylary alań ortasynda doptan aırylyp qaldy. Ony ala shapqan belgııalyqtar zýyldap qarsy jaqqa jetip keldi. Áýeli Iаn Vertongen aıyp alańyna kirdi de, sol qanattaǵy Kevın de Brıýınege jetkizdi. Biraq sońǵysynyń soqqysy sátsizdeý oryndaldy.
Ekinshi taımdy da Belgııa quramasy qarqyndy bastady. Komanda, ásirese, 54-60-mınýttar aralyǵynda amerıkalyqtar qaqpasy aldynda birneshe qaýipti sátter týǵyzyp, esep ashyp kete jazdady. Biraq buǵan soqqylardyń dáldigi jetispeı jatty. Ara-arasynda qarsylastarynyń qarsy joryqtaryna jol berip qoıyp turǵan «qyzyl fýrııa» budan ary da qysym jasaýyn toqtatpady. Bulardyń arasynda da qaqpaǵa túsip kete jazdaǵan doptar boldy. Solardyń birinde 72-mınýtta Dıvok Orıgı amerıkalyqtar qaqpashysynyń qyraǵylyǵyn taǵy baıqap kórdi. Al Tım Hovard oǵan daıyn bolyp shyqty. Osyndaı sátter 76, 78 jáne 79-mınýttarda da oryn aldy. 85-mınýtta taǵy qaqpashy belgııalyq forvardtyń urǵan dobyn mańdaıshadan asyryp jiberdi. Bul aralyqta «qyzyl fýrııa» bergen buryshtamalarynda da esep joq. Al amerıkalyqtar ekinshi taımda mundaı qurmetke bir ret te ıe bola almady.
Belgııa quramasy óz qaqpasyna jasalǵan shabýyldan keıin 88-mınýtta taǵy joıqyn joryqqa shyqty. Onyń sońy qaqpaǵa dop urýmen aıaqtaldy. Osy sátte Tım Hovard taǵy dopty qaqpa syrtyna jiberdi. Osydan keıin de eýropalyqtar eki ret gol soǵý múmkindigin aldy. Alaıda, sońǵy mezette sáttilik jetpeı jatty. Al oıynǵa qosylǵan eń sońǵy mınýtta amerıkalyq Krıs Vondolovskıı qaqpa aldynda turyp urǵan dobyn aspandatyp jiberdi. Osymen negizgi ýaqyt 0:0 bolyp támamdaldy.
Qosymsha taım aldyńǵy kezeńderdegi qarqynnyń basylmaǵanyn kórsetti. Taǵy da quıyndaı quıǵytqan shabýyldarǵa kezek keldi. Solardyń biri 93-mınýtta jasaldy. Aldymen Romelý Lýkaký oń qaptalda dopqa talasty jeńip shyqty. Ol sosyn qaqpa alańyna qaraı zýyldady. Biraq onyń soqqysy dál bolmady. Al qaqpashynyń aıaǵynan qaıtqan dop Kevın de Brıýıneniń oń jambasyna kele qaldy. Soqqy! Onyń jerletip urǵan doby baǵannyń dál janynan ótip, torǵa kúmp ete tústi. Gol! Budan keıin AQSh fýtbolshylary jandana tústi. Eki jaqtyń alma-kezek shabýyly arasynda muhıttyń arǵy jaǵalaýynan shyqqandar da birneshe qaýipti soqqylar jasaı bildi.
Áıtkenmen, kezdesýdiń sońy Belgııa quramasynyń basymdyǵyn taǵy bir golǵa aınaldyryp shyǵa keldi. Ony osynyń aldyndaǵy golǵa qatysy bolǵan, oıynǵa qosylǵanyna kóp bolmaǵan Lýkaký túsirdi. Budan ári adam túsinbesteı jaǵdaı bolyp ketti. Alańǵa endi ǵana shyqqan amerıkalyq Djýlıan Grın 107-mınýtta aldyna kelgen dopty toqtatpastan uryp, qaqpaǵa kúmp etkizdi – 1:2. Bul az bolsa, osynyń artynsha amerıkalyqtar esepti teńestirip ketýge sál-aq qaldy. Al sonyń sońyn ala Belgııa quramasy esepti ulǵaıtýdyń taǵy bir múmkindigin jiberip aldy. Budan keıin tap osyndaı múmkindik AQSh quramasynda da boldy.
Oıynnyń aqyrǵy mınýttary eki jaqtyń kezekpe-kezek shabýyldary ústinde aıaqtaldy.
Endi Belgııa quramasy 5 shilde kúni ótetin shırek fınaldyq matchta Argentına quramasymen kezdesedi.
Damır Qojamqul.
Derekkóz: egemen.kz.
Foto: Sportbox.ru.