Ekibastuzda lyq toly avtobýsta kámeletke tolmaǵan kolledj stýdentine er adam shabýyl jasady. Polıseıler bul derekke qatysty tergeý jumystaryn bastady, dep habarlaıdy Egemen.kz Tengrinews.kz saıtyna silteme jasap.
Jábirlenýshiniń anasynyń aıtýynsha, oqıǵa 31 naýryzda tańerteń qalalyq avtobýstardyń birinde bolǵan. Kámeletke tolmaǵan qyz synyptastarymen birge kolledjge bara jatqan.
«Saǵat 07.40-ta «Qazaqstan» aıaldamasyna jaqyndap qaldyq. Avtobýsqa adam lyq toldy. Men shyǵa beriske jaqyn turdym. Qasymda áje men kishkentaı bala boldy. Maǵan shabýyl jasaǵan er adam artymda turyp, bizdi qatty ıterip jiberdi. Men ıyǵynan túrtip, abaı bolýyn ótindim, al ol meniń tamaǵymnan ustap tunshyqtyra bastady. Sol kezde qasymyzda basqa er adamdar turdy, biraq maǵan eshkim kómektespedi. Qashý úshin onyń aıaǵyn tebýge týra keldi. Avtobýstyń esigi ashylǵanda men qashyp ketý úshin shyqqym keldi, al ol men shyǵýyma barynsha kedergi keltirdi», dedi 16 jastaǵy qyz.Aıtýynsha, beıtanys er adam aıaldamaǵa kelgende taǵy da tıispek bolǵan.
«Men júrip bara jatyp jylap, aıǵaılap urystym. Ol burylyp kelip judyryǵymen urǵysy keldi. Biraq qasymyzdan ótip bara jatqan áıel kórip, basqalardy kómekke shaqyrdy. Aldymen bir er adam júgirdi, sosyn taǵy ekeýi keldi. Shabýyldaýshyny ustap turǵanda, synyptastarym meni úıge alyp ketti. Qatty qoryqqanymnan polısııa shaqyrýdy oılamappyn. Úlkender maǵan shabýyl jasaǵan er adamdy bosatyp jiberip ózderi avtobýsqa otyryp ketti. Keıinirek kýágerlerden onyń avtobýstyń sońynan júgirip baryp, áınekti urǵanyn bildik», dep qosty boıjetken.
Sol kúni jábirlenýshiniń ata-anasy polısııaǵa aryzdanǵan.
«Qyzymnyń tamaǵy aýyra bastady. Qatty kúızelisten ol qazir avtobýsqa jalǵyz otyrýǵa da qorqady», dep túıindedi kámeletke tolmaǵan qyzdyń anasy.
Ekibastuz polısııasy bul fakt tirkelgenin, tekserilip jatqanyn málimdedi.