«Kazgıdromet» RMK sınoptıkteri 4-6 sáýirge arnalǵan aýa raıy boljamyn usyndy, dep habarlaıdy Egemen.kz.
Jerorta teńizinen jyljyǵan Batys sıklony jáne onymen baılanysty atmosferalyq frontaldy bólimder eldiń basym bóligine áser etedi.
«Qazaqstannyń batys jáne ońtústik óńirlerinde jańbyr, ońtústik-shyǵystyń taýly aımaqtarynda jaýyn-shashyn, 5-6 sáýirde elimizdiń ońtústiginde, ońtústik–shyǵysynda qatty jaýyn-shashyn (jańbyr, qar) kútiledi. Taımyr túbeginen jyljyǵan soltústik sıklon aıasynda 6 sáýirde Qazaqstannyń soltústik-batysynda, soltústiginde jańbyr jaýady dep kútiledi. Respýblıka boıynsha jel kúsheıedi, eldiń ońtústik aımaqtarynda shańdy daýyl men naızaǵaı, ońtústik-shyǵystyń taýly aımaqtarynda tuman kútiledi. Temperatýralyq fonda kúrt ózgerister bolmaıdy dep boljanyp otyr», delingen habarlamada.