Mańǵystaýlyq bloger Azamat Sársenbaev óziniń Instagram-daǵy paraqshasynda oblystaǵy lastanǵan jerdi túsirip, vıdeo jarııalady. Onyń aıtýynsha, mundaı qoqys alańy jaqyn mańdaǵy qorshalmaǵan polıgonnyń kesirinen qalyptasyp otyr, dep habarlaıdy Egemen.kz.
Vıdeoda Munaıly aýdanynyń Baıandy aýyly beınelengen.
Bloger, vıdeograftyń aıtýynsha, Baıandy aýylynyń mańynda búkil Aqtaý men Mańǵystaý oblysynyń halqy eń tyǵyz ornalasqan aýdanynan (Munaıly aýdany) turmystyq qaldyq tógilip, suryptalatyn polıgon bar.
«О́kinishke qaraı, dalada shashylyp jatqan osy qoqystyń barlyǵy - sheneýnikterdiń ǵana emes, qoǵamymyzdyń da qorshaǵan ortaǵa degen nemquraıdy kózqarasynyń saldary. О́ıtkeni jurtshylyq múddeli bolsa, durysyn surasa, mundaı sumdyqtyń aldyn alýǵa bolar edi. «Biz tastaǵan qoqys qaıda ketedi?»,«Polıgon nege qorshalmaǵan?» «Qarapaıym ekologııalyq normalar men talaptar nege saqtalmaıdy?» «Keń-baıtaq jerimizde sellofan paketteri nege sańyraýqulaqtaı ósedi? Bizge ne bolǵan?», dedi Azamat Sársenbaev.